Alyas Waway dunay anting-anting

Misamot kasikat si Warlito Toledo alyas Waway human sa negatibong resulta sa operasyon sa Criminal Intelligence and Investigation Section sa Lapulapu Police Station, tungod kay mikatap ang taho nga aduna kini anting-anting ug mahimong bitin hinungdan nga daling makaipsot sa mga awtoridad.

Apan si Chief Insp. Edwin Ermac, hepe sa Police Community Relations sa Cebu Provincial Police Office, nagkanayon nga igo lang gipadako ang isyu kalabot ni Alyas Waway.

“Akong klarohon walay actual threat. Walay report nga miabot sa Operations Branch sa CPPO nga dunay gipamatay o ba kaha gipanglugos. Pulos ra na rumors hoping nga mawagtang na ang panic sa katawhan. Atong hatagan sila og peace of mind,” si Ermac nagkanayon.

Giangkon hinuon ni Ermac nga ang kapolisan sa Danao wala nay hunong sa pagpangita kang Waway tungod kay may giatubang kining mga kaso ug dili tungod sa nanggawas nga report batok niya.

Nalipay hinuon si Ermac tungod kay nakita ang pagpakabana sa publiko sa pagtumaw sa report batok ni Waway.

Ang kapolisan sa Danao pinanguluhan ni Supt. Larson Dechino namutang og mga hulagway sa kada barangay aron i-report sa higayon nga makit-an sa mga residente.

Si SPO4 Teofilo Deguilmo nga nahinabi sa Banat News nahingangha sa paghingalan kang Waway nga “serial killer” nga base sa ilang rekord, kasong pagpanglugos lamang niadtong 2003 ang iyang giatubang ug wala kini kasong pagpatay.

Apan sa unang report gikan sa Danao Police Station, nasayran nga may kasong frustrated murder ug snatching nga giatubang ni Waway.

Si SPO2 Honorato Tano sa CIIS-Lapulapu nahadlok nga sakyan sa mga tawong walay lingaw ang kalisang sa mga tawo batok ni Waway.

Kahinumduman, si Waway gikahadlokan sa mga lungsod sa Liloan ug Compostela ug sa dakbayan sa Danao tungod sa report nga manuktok kini sa kabalayan ug kadtong mangabli nga babaye malugosan ug patyon niini.