Chinese candies wala pa ma-recall –– BFAD

Hangtud karun wala pay giluwatang recall order ang Bureau of Foods and Drugs (BFAD) batuk niadtong mga candy nga hinimo gikan sa nasud sa China nga maoy gitumbok nga nakalanag sa kapin 30 ka mga tinun-an sa San Agustin Elementary School sa lungsod sa Madridejos Cebu sa isla sa Bantayan sa niaging semana.

Gibutyag ni Grace Cardona, food regulation  officer sa BFAD-7 nagpaabot pa sila karun sa resulta sa confirmatory test sa mga sample sa ube milk candy nga gipadala didto sa laboratory sa BFAD-Manila alang sa mas subsob nga pakisusi.

Matod ni Cardona nga pagkakarun wala pa silay lakang nga gihimo batok sa mga susamang klase sa candy nga padayung gipamaligya sa kamerkadohan dinhi sa rehiyon ilabina sa Sugbu tungod kay wala pa usab silay direktiba nga nadawat may labot niini.

Paabuton hinoon sa BFAD-7 ang resulta sa confirmatory test ingon man ang rekomendasyon alang sa implementasyon niini sa higayun nga mogawas na ang resulta niini.

Gitug-an ni Cardona nga hangtud karun padayun silang nanghipos og dugang mga sample sa susamang mga candy nga gibaligya sa katindahanan alang sa dugang pakisusi nga posibling ilang himoon pagtino kun mao ba gyud kini ang hinungdan sa pagkalanag sa mga tinun-an didto sa isla sa Bantayan.

Ang kagamhanan sa China nipadala na sa ilang representante dinhi sa Sugbu pipila ka adlaw human sa hitabo aron pagkonpirmar sa report nga ang maong mga candy nga hinimo sa China ang nakalanag sa mga tinun-an.