Alias Waway gikahadlokan sab sa Lapulapu

Ang gikahadlokan nga serial killer  sa Liloan, Compostela ug Danao gikahadlokan na usab karon sa mga taga Lapulapu tungod sa taho nga namay-ongan kini sa mga residente nga nagsuroysuroy sa maong dakbayan.

Si Warlito Toledo alyas Waway nga lumad nga taga Sitio Banaba, Guinsay, Danao, gikahadlokan usab nga manaka sa kabalayan, manglugos ug mopatay sa mga taga Lapulapu.

Si SPO2 Honorato Tano sa Criminal Intelligence and Investigation Section (CIIS) sa Lapulapu Police Station, mipadayag nga human niya madawat ang maong impormasyon, iya dayong gipahibalo ang iyang mga kaubanang operatiba sa CIIS lakip na ang ilang mga assets alang sa dinaliang pagkasikop ni Waway.

 Matud pa ni SPO2 Tano mas maayo unta nga ang ilang buhatan mahatagan og hulagway ni Waway inay nga adto kini ihatag sa mga drayber sa traysikol.

Pipila ka mga residente sa Lapulapu nga nahinabi sa Banat News, mibutyag nga sa Sitio Sta. Maria, Pusok, Lapulapu sa milabay’ng gabii usa ka residente ang gituktok mga alas 11 sa kagabhion, apan gumikan kay wala kini ablihi sa tagbalay, gilud-an ang mga tsinelas niini.

Ang mga tsinelas adunay mga agi sa luwa nga maoy usa sa modus operandi ni Waway nga kun siya pasudlon sa mga tagbalay nga iyang biktimahon, iyang lud-an ang mga tsinelas nga gipamutang gawas sa pultahan.

Laing residente (dili magpaila) mibutyag sa Banat News nga siya mismo nakakita sa tulo ka klase sa hulagway ni Waway nga gipakatap sa mga drayber sa traysikol — gikan sa iyang pagka-semi opaw ngadto   na sa iyang hulagway nga taas og buhok ug naglatid usab sa mga kaso niini nga rape, frustrated murder, snatching ug kini armado ug delikado alang sa katawhan.

Gumikan niini, ang kapolisan sa dakbayan sa Lapulapu mihimo na og mga lakang pagmonitor ug pagsikop sa gituohang “serial killer” nga si Waway.

Laing impormasyon nga nakuha sa Banat News nagkanayon nga lisud madakpan si Waway tungod sa iyang anting-anting.

Apan ang kapolisan sa Danao mihimo og lakang pagsikop ni Waway.