Tigulang dam-agan og motor sa Sogod

Parehong kritikal ang kahimtang sa usa ka drayber sa motorsiklo ug ang iyang nabanggaan nga usa ka tigulang sa miaging hapon pasado alas 5 diha sa sitio Panangatan,  Bawo, lungsod sa Sogod.

Anaa karon nalandig sa usa sa mga tambalanan sa dakbayan sa Sugbu sila si Romel dela Cruz, hingkod, nga taga  Abo, Poblacion Sogod ug  ang iyang nadam-agan nga si Angelo Arnado Comendador, 83, nga taga sitio Panangatan, Bawo.

Segun sa report nga midangat sa Cebu Provincial Police Office  si dela Cruz nagmaneho sa kolor itom XRM nagtangag sa plaka 0W-5009.

Matud sa taho si dela Cruz niadtong tungora paingon sa Poblacion apan pag-abot sa nahisgutang lugar kalit lang milabang si Comendador ug wala na madala paglikay hinungdan nga iya gyud nga nabanggaan.

Gumikan sa kakusog sa impak ang duha parehong nangalamba sa sementadong karsada nga miresulta  sa pagkahiagom og mga samad sa kalawasan ingon man ang ilang ulo.

Daling gihatod ang duha sa Juan Dosado Memorial District Hospital sa Sogod apan pipila ka gutlo gibalhin sa wala matinong tambalanan sa dakbayan sa Sugbu alang sa dugang pag-atiman sa mga doctor .