Multicab nahulog sa sapa; 1 patay

Usa ka multicab  nahulog sa sapa human sa kalit nga pagkapawong sa makina samtang nagtungas sa subidahon nga bahin sa karsada diin mikalas og usa ka kinabuhi ug miangol sa lain pang upat lakip na ang drayber niini.

Nahitabo kini pasado alas 2  niadtong Sabado sa hapon diha sa South Poblacion, lungsod sa San Fernando, Cebu.

Ang multicab nga nagtangag sa plaka nga YBR-263 gipanag-iya ni Joan Iwanaga nga taga N. Bacalso Avenue, dakbayan sa Sugbu ug gimaneho ni Aurelio Siarot, hingkod ug residente sa barangay Lantawan, San Fernando.

Niadtong tungora sakay ni Siarot ang iyang ginikanan nga sila si Angelo ug Remedios Siarot    ug laing duha nga sila si Roger Morales ug Dionela Geraldez, silang lima pulos residente sa barangay Lantawan.

Base sa gihimong imbestigasyon ni PO1 Alvin Enan sa San Fernando Police nasayran nga si Siarot gikan sa habagatan ug paingon sa merkado publiko sa maong lungsod.

Apan sa ilang pagliko sa tuo ug sakaon nga bahin sa maong lugar kalit lang napawong ang makina sa multicab.

Dihadiha kalit nga miatras ang multicab ug si Siarot niadtong tungora medyo nawad-an og kontrol hinungdan nga wala na makalubag sa manobela ug miresulta hinuon sa pagkatagak ngadto sa sapa     duol sa dakong taytayan sa San Fernando.

Daling gipanghatod sa South General Hospital ang mga biktima apan ang inahan nga si Remedios maoy nagrabihan sa maong insidente nga gideklarar kining dead on arrival sa mga doktor sa nahisgutang tambalanan.