Gitinguha karon sa kagamhanan sa dakbayan sa Lapu-Lapu ang pagpasiugda og orientation seminar sa mga lumolupyo alang sa safety tips sa paggamit sa kuryente.
Kini ang gipadayag ni Bise Mayor Mario Amores isip lakang sa kagamhanan sa dakbayan human sa nagsunodsunod nga panghitabo sa sunog sa dakbayan nga mikalas pa og tulo ka kinabuhi.
Matud pa ni Amores nga ilang awhagon ang mga opisyal sa kabarangayan sa dakbayan aron maoy modapit sa mga lumolupyo sa pagtambong sa maong fire safety seminar.
Si Konsehal Efren Herrera nga gikahinabi sa Banat News mipadayag usab sa iyang suporta sa maong tinguha sa kagamhanan sa dakbayan.
Gipasabot ni Herrera nga gitumong alang sa kaayuhan sa mga residente ang pagpasiugda og orientation seminar alang sa fire safety sa paggamit sa kuryente.
Giklaro ni Herrera nga nagkinahanglan gyod nga kahatagan og giya ang mga lumolupyo sa dakbayan alang sa tukmang paggamit sa kuryente aron kalikayan ang mga panghitabo sa aksidente sa sunog.
Si SF01 Cecilio Torrifil nga gikahinabi sa Banat News mitug-an nga mokabat sa P1.2 milyones ang kantidad sa mokabat 11 ka balay nga nasunog sa barangay Ibo sa maong siyudad.
Dugang pa niya nga ang ulahing sunog nga nahitabo sa barangay Ibo maoy labing dakong kantidad nga mokabat sa 11 ka balay ang naugdaw nga nag-una niini mao ang nasunog nga panimalay sa barangay Looc nga mikalas og tulo ka kinabuhi.