Gituohang posibleng pangilad ang nakit-ang mga US bank notes diha sa usa ka kasagingan sa barangay Talaga sa lungsod sa Argao ug ang target mao ang mga langyaw.
Kini kun mapamatud-ang peke ang maong mga US Bank Notes nga giingong nagkantidad og 3 trilyones dolyares nga gisulod sa usa ka kaban nga kahoy nga giputos og nipis nga bronse.
Si Department of Interior and Local Government Under Secretary Joselito “Lito” Ruiz kinsa misaksi sa pagpresentar sa maong kaban diha sa buhatan ni Police Regional Office-7 director Chief Supt. Ronald Roderos kagahapon mitug-an nga pangilad ang maong bahandi.
Kini gibase lang niya sa iyang obserbasyon sa dagway sa kaban kung tuuhan ang gikulit nga tuig diha sa gawas sa maong kaban nga nag-ingong “series of 1934.”
Matud pang Ruiz, ginama lang sa kahoy ug giputos og nipis nga bronse ang maong kaban dili sama sa karaang mga kaban nga kung dili ginama sa baga nga kahoy, ginama gyud kini og baga usab nga puthaw o ba kaha bronse.
Namatikdan usab ni Ruiz kinsa usa ka aircraft mechanic kaniadto nga pinalubong ra ang ‘rivets’ niini aron maoy mohawid sa nipis nga bronse ug dili sa kinaraang mga “rivets” nga dagko ug lapos sa pikas aron mas lig-on.
Hinuon miangkon si Ruiz nga di siya eksperto sa maong kaban, apan miuyon nga bugtong makasusi niini mao ra gyud ang mga eksperto gikan sa Estados Unidos.
Matud pang Ruiz nga kung mamatud-ang peke kini, posibleng mga langyaw lang ang mabiktima niini nga bag-uhay pang nakataak dinhi sa Sugbu.
Sa kasaysayan, ang Pilipinas particular na ang Sugbu napatik na nga mga dapit nga nasakop sa mga langyaw kaniadto. Nunot niini dunay mga nanggawas nga mga tabi-tabing dunay nahabiling mga bahandi o bulawan ang mga langyaw'ng mananakop.
Lakip na niini ang gubat sa World War II diin ang Japanese Imperial Army General nga si Tomoyoki Yamashita, pangulo sa 14th Japanese Imperial Army nga maoy mipabilin dinhi sa Pilipinas aron taguon ang mga kinawat nilang bahandi gikan sa mga nasud nga ilang nasakop sa Asya.
Dinhi na mitumaw ang ‘Yamashita Treasure “Golden Budha” ug uban pa, duna say mga antigong mga relihiyosong mga imahe nga nangadiskubrehan dinhi sa Sugbu.
Matud pang Ruiz, kini maoy hinungdan nga nagamit usab sa mga mapahimuslanong mangingilad ang kasaysayan pinaagi sa pag-imbento og estorya ug mga mini nga mga butang.
Apan kung ang maong mga US Bank Notes mapamatud-ang tinuod, hayan posibleng mabahinan ang gobiyerno niini ug alang kang Ruiz dako kini og matabang sa kahimtang sa ekonomiya karon sa nasud.
Sumala pang Ruiz magamit kini sa pagtukod og mga imprastraktura, dugang serbisyo sa katawhan ug uban pa.
Duha palang ka compartment sa 13 niini ka compartments ang naablihan ug gituuhang ang nahabiling compartments mao gihapon ang sulod, apan karong adlawa pa kini ablihan atubangan sa presensya sa taga US Embassy.
Si Sr.Supt. Carmelo Valmoria nagkanayon nga ila ng gisubay karon kung si kinsa ang tag-iya sa pulang Kia Sportage nga giingong miabot diha sa lugar pipila ka minutos human mibiya ang usa ka Caucasian nga sakay sa pulang Pajero nga maoy nibilin sa maong kaban.
Ang maong Kia Sportage gikatahong dunay sakay nga tulo ka mga lalaki ug tulo ka babayeng pulos gidudahang mga Asyanong langyaw.
Si Roderos sa iyang bahin nagkanayon nga kung pangilad lang kini, iyang gipahimangnoan ang katawhan nga dili magpadala sa maong mga modus operandi.
Kini tungod kay ang mga mangingilad mangapital lang og mini nga butang ug ang pagdani dali nalang tungod usab sa kahakog sa ubang mga tawong ilarunon usab.
Apan kung kini tinuod, kini nangahulugang P135,000,000,000 trilyones, paigo ng ibayad sa tanang utang sa nasud sa World Bank, duna pay dakong sobra, ang Kongreso mipasar sa annual budget sa nasud karong tuiga og P1.3 trillion.
Nangahulugan nga bisan 130 pa ka tuig nga mogahin ang kongreso og susamang budget dili mahubsan ang gobiyerno tungod kay duna man say ginansayahon nga makuha sa matag gastuhan niini. — ug Edwin Ian Melecio