Talisay wa pa mohatag sa ‘share’

Duha na lang ka semana magsugod na ang eleksiyon sa barangay ug Sangguniang Kabataan karong petsa 29 apan ang kagamhanan sa dakbayan sa Talisay wala pa mopagawas og salapi isip “share” nila sa maong duha ka piniliay, matud ni Talisay City Election Officer Corazon Moran.

Matud ni Moran nga mipadala na ang iyang buhatan og request ngadto sa buhatan sa city budget officer alang sa mga bond paper nga gamiton sa nahisgutang eleksiyon diin ang kantidad niini mokabat sa P30 mil apan gibalibaran sila ni City Budget Officer Edgardo Mabunay nga ang siyudad wala nay salapi alang niini.

Si Moran gibati og kabalaka nga ang siyudad walay budget usab alang sa honoraria sa mga moserbisyo sa eleksiyon tungod kay wala gani kini budget alang sa mga bond papers.

Gibutyag ni Moran nga ang una nilang problema karon sa umaabot nga eleksiyon mao ang budget.

Gihinumduman sa Comelec officer nga niadtong eleksiyon sa barangay sa tuig 2002 adunay mga board of election inspector ang wala mahatagi og honorarium tungod kay ang mga barangay nga ilang giserbisyohan ug ang lokal nga kagamhanan sa siyudad walay koordinasyon ilabi na sa mga obligasyon niini.

Si Moran nagkanayon nga bisan og aduna nay P2.6 bilyones nga budget nga gi-release sa Department of Budget and Management (DBM), ang matag lokal nga kagamhanan nagkinahanglan usab nga mohatag og salapi alang sa ilang counterpart sa eleksiyon.

Si Moran midugang nga giktakdang karong Martes liwas sa pagsaulog sa pista sa dakbayan  mag-istorya sila ni Mabunay kabahin sa nahisgutang problema.