Dakbayan sa Talisay usa pa ka “dengue free” matud ni Konsehal Sergio “Serie” Restauro kinsa tsirman sa Task Force Dengue sa siyudad.
Gibutyag ni Restauro nga niadtong buwan sa Septiyembre nagtukod sila og Barangay Dengue Brigade diin diha sila mag-una sa Barangay San Isidro ug karong Sabado isunod nila sa Barangay San Roque.
Gipasabot sa konsehal nga ang tumong nila sa dengue brigade mao ang pagsumpo sa mga nguyo-nguyo o itlog sa lamok aron masumpo ang pagkuyanap sa lamok nga dunay dengue.
Matud ni Restauro nga kompara sa ubang mga lugar ubos lang ang kaso sa dengue sa siyudad.
Sukad niadtong buwan sa Enero hangtod sa Hunyo niining tuiga ang dakbayan adunay 29 ka kaso sa dengue kinsa duha niini ang patay.
Si Restauro midungag nga nangayo siya og ayuda sa kagamhanan sa probinsiya ug sa buhatan sa city health sa rehiyon sa mao niyang kalihokan.
Ang konsehal midungag nga ang bata mas daling mataptan og virus sa dengue tungod kay hinay ang resistensiya niini kompara sa dagko.