Bullecer wala na matingala

Wala na masurpresa ang pro-life crusader nga si Doctor Rene Josef Bullecer sa resulta sa usa ka pagtuon nga gihimo sa National Statistical Coordination Board kon NSCB.

Ang resulta nagpakita nga dili sex kon pakighilawas ang nag-unang tinubdan sa kalipay sa mga Pinoy, kun dili ang Pamilya, Kahimsog sa panglawas ug Relihiyon.

Matud ni Bullecer nga isip predominantly Christians, dili malalis nga mas hatagan og bili sa mga Pilipino ang pamilya ug relihiyon.

Giangkon hinuon ni Bullecer nga manggiuwawon ang mga Pinoy nga mosulti sa tinuod nilang gibati kung kalipay na maoy hisgutan.

Apan alang kaniya nga nipatigbabaw gyod ang kamahinungdanon sa pamilya sa maong survey ug kini angayang palig-onon sa matag magtiayon.

“I hope that it will be strengthened considering nga lose na ang morality worldwide tungod sa mga atake sa pamilya ug sex revolution,”sumala pa ni Bullecer.

Partikular nga gitombok ni Bullecer ang mga nasod sa Amerika ug Urupa nga giingong taas ang ilang rate sa divorce ug extra-marital affairs.

Ang survey sa NSCB nagpakita usab nga gawas sa Pamilya, Kahimsog sa panglawas ug Relihiyon, duna pay laing tinubdan sa kalipay ang mga Pinoy.

Kini mao ang Kwarta, Edukasyon, Trabaho ug uban pa.

Sa nahisgutang pagtoon nahimutang lang ang sex kon pakighilawas sa ika-katorse nga puwesto mas layo kay sa gituuhan sa uban.

Hinoon ang mga respondents nihatag og 72.6% nga index rating sa pakighilawas itandi sa financial security, trabaho ug sports.

Kini nagpasabot nga sila mas labaw nga malipay sa pakighilawas itandi sa nahisgutang mga tinubdan.