Election volunteers hataga’g medical insurance – Benhur

 Si Kongresista Benhur Salimbangon nipahibalo nga moduso siya’g balaudnon nga maghatag og medical insurance sa mga Election Volunteers dinhi sa nasud kinsa niabag sa Commission on Election sa matag election.

Si Salimbangon nagkanayon tumong ug tuyo sa maong balaudnon nga sa matag bisan unsang election dinhi sa nasud mahatag gyud kini sa mga sakop sa CCIMFEL Namfrel ug uban pang volunteers.

Sumala pa sa kongresista nga iyang nakita kun unsa ka peligro ang kinabuhi sa mga volunteers labi na niadtong nadistino sa mga lugar nga gubot sama sa Mindanao ug niadtong mga lugar nga nagkabangi ang mga lider.

Matud pa niini nga siya mismo sa iyang bahin nakita niya kun unsa kalooy ug ka delikado sa ilang gimbuhaton ang mga election volunteers panahon sa mga election ug ang uban gani niini mapasanginlan pa nga manikas o dudahan nga kaalyado sa bisan unsang partido.

Iyang gipasabot nga panahon na nga lantawon usab ang mga kahimtang sa mga volunteers gumikan kay sagad niini adunay mga pamilya hinungdan nga iyang giduso ang 10 mil pesos nga medical insurance alang niini.

Hinuon iyang giklaro nga ang maong lakang tuki-on pa kini  didto sa Ubos balay balauranan apan kumpiyansa siya nga ang iyang mga kaubanan nga mga kongresista mosuporta niini gumikan usab sa ka importante sa maong balaudnon.

Sa nasayran nga una nang gipahibalo sa maong kongresista nga iyang giduso ang balaudnon nga maghatag og tagsa ka libo ka pesos nga cash allowance sa mga volunteers sa election kini tungod kay iyang nakita ang kapeligro sa ilang trabaho.