Patay ang usa ka 23-anyos nga lalaki human kini pusila duol sa iyang wala nga mata sa magsuong iyang mga silingang mipasangil kaniya nga “mibaligya” sa usa sa mga suspek kagahapon sa kaadlawon.
Ang patay nang naabot sa Vicente Sotto Memorial Medical Center giilang si Ronald Regis, 23, residente sa sitio Semper sa barangay Carreta ning dakbayan samtang gitumbok nga mipusil kaniya mao ang magsuong sila si JR Mago ug Glen Mago pulos residente sa sitio Railsite sa barangay Hipodromo.
Sa imbestigasyon sa Homicide Section pinanguluhan ni SPO4 Jesus Moga, nasuta nga ang biktima ug ang iyang kapuyong usa ka menor de edad ug silingang si Virgilio Samson alyas Tasyo, 20, diha sa maong balay dihang miabot ang mga suspek.
Ang mga magsuong suspek nangutana sa biktima kabahin kang Samson apan ang suspek nga si Glen nakamay-ong kang Regis ug kalit lang nga gipangutana kini og “Ngano man imo kong gibaligya?”
Wala pa makatubag ang biktima dihang kalit nga mibunot og armas si JR ug gipusil si Regis, apan mikagar ang armas hinungdan nga mipatunga si Samson aron sila pakgangon apan mibunot usab og laing armas si Glen ug gipusil usab si Samson apan diha miigo sa tuong bahin sa nawong duol sa mata ni Regis ang bala.