Nadsu way plano mosang-at petisyon para sa usbaw plete

Walay planong mosang-at sa pagkakaron ang Nagkahiusang Drayber sa Sugbu (NADSU) og petisyon susama sa gihimo karon sa mga asosasyon sa mga drayber ug operators sa kauluhan nunot niining pagsaka sa presyo sa lana sa kalibutanong merkado.

Si Danny Gato, usa sa mga miyembro sa Executive Committee sa NADSU-North Bound sa pakighinabi sa Banat News nagkanayon nga wala pay sabot-sabot nga ilang gihimong aron planong ipatuman ang P9 nga pletihang gipangayo sa mga drayber ug operators sa mga bus sa Luzon, samtang ang mga public utility vehicles nangayo og P6 nga minimum apan dugang P1.50 matag mosunod nga kilometro.

Ang buot sa NADSU mao ang hingpit nga pag-implementar nalang sa 2005 nga fare increase nga ilang gipangayo kaniadto nga P7.50 nga minimum sulod sa upat ka kilometro ug piso matag mosunod nga kilometro nga maoy gitugot sa Land Transportation and Franchising Regulatory Board sa tibuok nasud.

Apan miani og pagsaway ang mga transport groups dinhi sa Sugbu gikan sa mga sector sa mga sumasakay hinungdan usab nga ang maong sector misang-at og duha ka mga petisyong nag-awhag nga pakubsan kini ug himuong lima ka kilometro ug P6 nga minimum lang ang pletihan ug piso sa mosunod nga kilometro.

Matud pang Gato, nagkamahal na karon ang presyo sa lana ug nitiyabaw na ang mga operators ug mga drayber tungod sa kagamay sa ilang madala pauli sa ilang mga pamilya sa tibuok adlaw nga pamasahero.

Gani ang NADSU misuporta sa mga rally sa mga mamumuo sa pagpangayo og dugang suhulan tungod kay sila mismong mga drayber naapektahan usab tungod kay ang mga mamumuo nga ilang sumasakay motiyabaw man sab kung dunay fare increase ug ang ilang suhulan wala umentuhi.