Dunay pipila ka mga barangay dinhi sa Central Visayas ang gibulgar sa Central Command (Centcom) nga dunay mga kandidato sa nagsingabot nga Barangay ug SK election nga suportado sa mga rebelding New People’s Army (NPA).
Subay sa press release nga giluwatan ni Col. Oscar Lasangue, group commander sa 3rd Civil Relations Group dili mominos 20 ka mga barangay dinhi sa rehiyon ang nakonpirmar nila nga dunay mga rebelde ang nag-apil-apil sa umaabot piniliay.
Tulo ning maong mga barangay nahimutang sa Mid North Area dinhi sa Sugbu ug ang laing 17 ka barangay nahimutang didto sa Bohol base sa mga impormasyon nga nahipos gikan sa intelligence community.
Giklaro ni Lasangue nga inisyal pa lang nila kini nga report ug padayon pa ang ilang pag-monitor sa uban pang mga barangay nga nakasinati karon og susamang problema.
Gihulagway ni Lasangue nga subay sa ilang nahipos nga impormasyon usa kini ka paagi sa rebelding NPA aron mosaka ang koleksyon sa ilang revolutionary tax tungod kay kun modaog ang mga kandidato nga ilang paluyohan pangayoan nila og 10 porsiyento nga bahin sa Internal Revenue Allotment (IRA) ug laing 10 porsyento nga share gikan sa mga proyekto sa barangay nga mapatuman niini.
Giangkon sa dakong opisyal sa Centcom nga alarming kining maong nahipos nilang impormasyon. “And one more thing, it is part of the agreement to their sponsored or supported candidates not to allow military to put up detachments in their barangays,” dugang asoy ni Lesangue.