Gipusil ang usa ka 18 anyos nga lalaki sa iyang silingan human wala mopatuo nga hunongon ang pagpunay og pabuto sa firecracker.
Nahitabo kini kagahapon sa buntag diha sa Ponce II, barangay Carreta, dakbayan sa Sugbu.
Ang napusilan ug daling gidala sa Cebu City Medical Center giila nga si Delfin Padilla Dela Torre, ulitawo ug residente sa maong dapit samtang ang nipusil kaniya giila usab nga si Juanito Mendros, 30, ulitawo, usa ka cellphone technician ug silingan sa biktima.
Sa gihimong imbestigasyon ni SPO4 Alex Dacua ug mga kaubanan sa homicide section ug base sa pamahayag sa biktima nga kasamtangan siyang naglingkod duol sa ilang tindahan samtang nagpunay duslit sa pabilo sa pabuto.
Apan kalit lang niabot ang suspek nga armado og wala matinong kalibre sa armas ug gipusil ang biktima.
Ang biktima naigo diha sa tuong batiis ug daling gihatud sa mga kabanay sa nahisgutang tambalanan samtang ang suspek nasikop sa mga miresponding sakop sa Mobile Patrol Group Car 020 nga gipangulohan ni SPO2 Ricardo Abesia ug duha ka kauban nga sila si PO2 Norman Patindol ug PO1 Rommez Mediodia.