Nagduwa’g pusil batang 4 ug 5 anyos naunay, naangol

Naunay sa armas ang duha ka mga bata nga managsuon nga nagpangidaron pa og 4 ug 5 anyos human mibuto ang pusil sa ilang amahan nga ilang gidulaan.

Nahitabo kini sa miaging hapon pasado alas 4 sulod sa ilang pinuy-anan diha sa barangay Sabang siyudad sa Danao.

Ang managsuon giila nga sila si Robert Jay Bual Martinez, 4, ug ang maguwang niining si Rogelyn, 5 anyos ug residente sa nahisgutang lugar.

Base sa pasiunang imbestigasyon ni SPO1 Rodrigo Roble nasayran niadtong tungora ang duha ka mga bata maoy nahabilin sa ilang pinuy-anan kay ang mga ginikanan wala diha.

Ang duha ka biktima nagkalingaw og dula sulod sa ilang balay hangtud nga naukayan sa maguwang  ang .38 nga pistola nga gitago sa ilang amahan diha sa sapatos.

Nasayran ang ilang amahan nga si Ramil usa ka security guard.

Gikatahong gidulaan sa maguwang ang armas sa ilang amahan hangtud nga nakablitan ang gatilyo niini ug nibuto og didto mopunta ang bala sa walang kamot ni Rogelyn ug naigo usab ang iyang manghud sa tuong dughan ug nilapos ang bala sa buko-buko.

Ang duha daling gihatud sa Danao District Hospital apan gibalhin dayon sa Vicente Sotto Memorial Medical Center alang sa dugang pag-atiman sa mga doctor.

Si SPO1 Roble nakarekober og .38 caliber, six shooters nga dunay duha ka buhing bala ug usa ka empty shell.

Kasong reckless imprudence ang itaganang kaso sa kapolisan kung mamatud-ang nagpabaya sila sa ilang responsibilidad sa ilang duha ka anak.