Comelec abli karong adlawa

Abli ang mga buhatan sa Commission on Elections (Comelec) sa dakbayan sa Sugbu karong adlawa.

Kini bisan pa man kun gideklarar ni Presidente Gloria Macapagal Arroyo ang Oktobre 12 nga regular holiday.

Giklaro hinoon ni Cebu City North District Election Officer Attorney Marchel Sarno nga dili sila manawat karon og mga Certificate of Candidacy kon COC.

Matud ni Sarno nga nalatid sa Comelec Resolution 8301 nga walay labot ang mga adlaw sa Sabado, Domingo ug mga holiday sa pagpanawat og mga COC.

Sumala sa election officer nga ang mga COC mahimo lang isang-at sa mga kandidato sa regular office hours, gawas sa deadline sa filing nga moabot sa alas 12:00 sa tungang gabii.

Gipasabot ni Sarno nga abli ang ilang mga buhatan karong adlawa tungod kay daghan pa ang ilang mga gimbuhaton nga atimanonon.

“Manunga mi sa among mga buhatan dili tungod kay manawat sa mga COC kun dili ipadayon namo ang among pagpriparar sa umaabot nga eleksyon,”suma ni Sarno.

Kini nagpasabot nga unya pa sa Lunes sunod semana mubalik ang mga buhatan sa Comelec sa dakbayan pagpanawat sa isang-at nga mga COC sa mga kandidato.

Gideklarar ni Presidente Arroyo nga holiday karong adlawa, aron sa paghatag og higayon sa Muslim Filipinos pagsaulog sa Eid’l Fitr (Feast of breaking the Fast).

Kini human usab sa usa ka buwan nga pagpuasa samtang sila mihimo sa balaanong kalihukan agig pagbag-o sa ilang commitment ngadto sa gituuhan nilang manunubos.

Ang Eid’l Fitr giingong mao ang katapusang adlaw sa balaang buwan sa mga muslim nga gitawag og Ramadan.

Gawas sa Comelec ug sa ubang pribado nga mga buhatan, walay trabaho ug labaw nang way klase karong adlawa sa tibuok kapupud-an.