Nabanggaan gibiyaan sa dalan

Patay na nga napalgan sa mga polis ang usa ka lalaki nga gibanggaan og sakyanan ug gibiyaan lang kini sa nakabangga kaniya kagahapon sa kaadlawon diha sa Cebu South Coastal Road habig sa Barangay San Roque, dakbayan sa Talisay.

Si SPO1 Joseph Glenn Burlas, hepe sa Traffic Division sa siyudad nagkanayon nga naabtan na lang nila ang biktima nga nagligdas sa karsada nga wala na maglihok ug posibleng naguroy kini sa sakyanan nga nakabangga kaniya tungod sa marka sa dugo nga nabagis diha sa karsada.

Matud ni Burlas nga ang nahisgutang lugar ngitngit ug walay nakakita sa hitabo.

Base sa pasiunang imbestigasyon sa mga polis nga posibleng ang biktima gikan diha sa sam-ang nga nahimutang sa lugar ug motabok unta kini sa pikas nga bahin  sa karsada.

Ang biktima gibanabanang 60-anyos ang panuigon, tabonon og pamanit, flat top ang buhok nga ubanon, nagsul-ob og t-shirt nga blue nga dunay stripe nga puti, basketball short ug naka-tsinelas kini og guma.

Ang patay'ng lawas sa biktima naa karon sa St. Francis Funeral Homes sa Natalio Bacalso niining dakbayan.

Hangtod sa oras niining pagbalita ang kapolisan sa Talisay wala pay saktong detalye sa hitabo.

Ang maong insidente maoy ikatulong hitabo sulod niining semanaha.

Unang insidente nahitabo niadtong  Oktubre 7  sa hapon  kinsa si Felipe Maglasang, 46, ang biktima.

Si Felipe namatay human kini mabanggai og sakyanan diha sa nahisgutang karsada habig sa eskina sa Barangay San Isidro.

Sunod nga insidente nahitabo niadtong Martes sa buntag diha sa habig sa Barangay San Roque kinsa ang gisakyang motorsiklo sa magtiayong Francis ug Louie Lynney Bargamento midasmag sa  trak sa provincial engineering.

Si Francisco namatay usab sa maong insidente ug ang asawa niini kritikal ang kahimtang.