Kandidato way drug test way seguro

Dili pa sigurado nga ma-disqualify ang kandidatura sa mga buot mopapili sa nagsingabot nga barangay ug sk election bisan pa man og dili sila makaduso og drug test clearance nga maoy usa sa rekisitos nga gipahibalo sa Commission on Elections (Comelec).

Kini human gipasabot ni Comelec Provincial Supervisor   Lionel Marco Castiliano nga kadtong mga  certificate of  candidacy (COC) nga walay gisukip nga drug test clearance  himuon kini og report sa mga hingtungdang election officer aron iduso didto sa law department sa Comelec-Manila.

Matud ni Castiliano ang law department na sa Comelec Manila maoy makadesisyon may labot sa estado sa kandidatura niini.

Hinuon gipadayag ni Castiliano nga subay sa mga report nga iyang nadawat gikan sa election officer sa kalungsoran wala pay mga kandidato nga nakaduso sa ilang COC nga walay gisukip nga drug test clearance.

Kini tungod kay sagad sa mga mokandidato sa matag lugar ang makigsabot kini sa drug test laboratory nga maoy personal nga mobisita sa ilang lugar alang sa pagpang drugtest nga himoon.

Kadtong mga kandidato nga wala pay drug test clearance subling gipasidan-an ni Castiliano nga magpa-drug test tungod kay tipik  kini sa rekisitos nga gipangayo sa Comelec.

Hinuon nagtuo si Castiliano nga kadtong mga kandidato nga dili gyud makaduso og drug test clearance ug modaug sa umaabot piniliay posibling dili kini palingkoron kun dili makaduso sa maong rekisitos.