59 ampules nga Nubain sakmit, 3 arestado

Tulo ka lalaki ang nasikop ug usa ang nakaipsot sa gilusad nga pagpangronda sa Criminal Investigation and Intelligence Branch (CIIB) sa miaging gabii diha sa sudlonong bahin sa Barangay Kamagayan, dakbayan sa Sugbu.

Ang CIIB nakadawat og report kabahin sa rampant nga pagpamaligya ug paggamit sa drugas nga Nubain diha sa nahisgutang lugar.

Hinungdan  milusad dayon og operasyon gipangulohan  sa CIIB  Sr. Insp. George Ylanan uban sa iyang mga sakop nga sila si SPO1 Filomeno Mendaros, PO2 Milo Arriola, PO2 Dale Efe, PO2 Edward Abatayo, PO2 Jonas Tahanlangit, PO1 Esmeraldo Quillosa ug PO1 Philip Plasus.

Naaktuhan sa grupo nilang Ylanan ang tulo ka mga tawo nga diha sa balay nga ninggamit og Nubain nga gipanag-iya sa ginganlan og Jonard  sila si Domingo Saberon, 30, taga Wireless, Mandaue ug nakuha sa posisyon ang disposable Syringe ug duha ka Ampules sa Nubain, Steve Delima, 37, nakuhaan og duha ka Syringe ug duha ka Ampules ug Cris June Degamo, 21, nakuhaan og lima ka Ampules sa Nubain ang duha pulos residente sa dalan Urgelio, barangay Kasambagan dakbayan sa Sugbu.

Samtang si Jonard nakaiskapo atol sa pagronda apan nakakuha ang grupo ni Ylanan sa iyang balay og 50 ka Ampules sa Nubain.

Matud pang Ylanan dihang nahinabi sa iyang cellphone nga wala na sila makabantay ni Jonard kun diin kini modagan tungod kay ang mga tawo naglumbaanay na og panagan ug posibleng ila ra kining naagian kay ang impormante lang ug usa ka polis maoy nakaila kang Jonard.