Gipahimangnoan karon ni Cebu City North District Election Officer, Attorney Marchel Sarno ang kapolisan sa dakbayan sa ilang pagpahigayon og Comelec checkpoint.
Partikular nga gipahinumduman sa election officer mao si Cebu City Police Office (CCPO) director Sr. Supt. Patrocinio Comendador.
Matud ni Sarno nga kinahanglang sundon sa kapolisan ang mga lagda nga nalatid sa Comelec resolution number 8312 aron dili unya mag-atubang og problema.
Section 2 sa nahisgutang resolusyon nag-ingon nga kinahanglang mukunsulta ang team leader ngadto sa election officer sa pagpahigayon niini og checkpoint.
Section 3 sa resolusyon nagkanayon nga kinahanglang magbutang og checkpoint signboard nga dunay pangalan sa election officer ug sa commanding officer o team leader.
Section 4 naglatid nga kinahanglang mohatag og notisya ang team leader sa election officer sa dapit diin kini mopahigayon og checkpoint.
Nasayran nga makapila na makapahigayon og checkpoint ang kapolisan sa dakbayan alang sa epektibong pagpatuman sa Comelec gun ban.
Gani ubay-ubay na ang nangasikop niini human usab makuha-i og ilegal nga mga butang diha sa ilang posesyon.
Apan matud ni Sarno nga siya wala makahinumdum nga nakapananghid kaniya ang kapolisan sa dakbayan sa gipahigayon niining mga checkpoint.
Wala hinuon malatid sa nahisgutang resolusyon nga masilutan ang mga pulis sa pagpahigayon og checkpoint nga dili motuman sa mga lagda.
Apan matud ni Sarno nga mahimong makawang lang unya ang kahago sa kapulisan kun ang checkpoint o ang pagdakop niini kwestiyonon sa ilang dinakpan.
Gipadayag sa election officer nga gikinahanglan nga sundon sa kapulisan ang tukmang proseso pagpahigayon og checkpoint aron dili malapas ang civil, political ug human rights sa mga maapektahan.