Nagkauli sa maayong kabubut-on human sa panagbangi tali sa duha ka mga opisyal sa kapolisan nga sila si Sr. Supt. Edgardo Ingking, hepe sa Bohol Provincial Police Office (BBPO) ug Sr. Supt. Arturo Evangelista, hepe sa Regional Investigation and Detective Management Division (RIDMD).
Kini human gipatawag kagahapon sa buntag ang duha ka mga opisyal sa bag-ong milingkod nga Deputy Regional Director for Administration (DRDA) nga si Sr. Supt. Federico Terte.
Si Terte nga nahinabi sa mga tigbalita kagahapon diha sa iyang buhatan sa Police Regional Office-7 niingon nga dunay miscommunication ang duha ka mga opisyal nga sila si Ingking ug Evangelista hinungdan nga iya kining gipatawag aron dili na padak-on pa ang maong isyu.
Kun kahinumduman si Ingking mipasaka og kasong misconduct batok kang Evangelista ngadto sa National Police Commission tungod sa gidusong report ngadto ni Chief Supt. Silverio Alarcio Jr., kanhi regional director sa PRO-7 nga dunay daghang "lapses" ang pagdumala niini sa Bohol Provincial Police Office.
Gikasagmuyo ug nakapaminus kini kaayo sa moral ni Ingking hinungdan nga iyang gireklamo si Evangelista tungod kay iyang gihulagway nga dili mao ang gibato ni Evangelista ngadto kaniya.
Nagplano usab si Terte nga ilang hangyuon ang Napolcom nga dili na lang ipadayon ang pag-endorsar ngadto sa buhatan sa presidente ang kasong gipadangat ni Ingking ngadto kang Evangelista.
Matud ni Terte nga susama lang sila og managsuon tungod kay pareho nga naa sa uniform service.
Sumala pang Terte nga nasakitan gyud si Ingking sa gipanulti ni Evangelista apan siya mipasabot nga lainlain og perception ang usa'g-usag ka tawo.
Apan giklaro ni Terte nga mohimo sila'g validation sa Regional Headquarters batok kang Ingking.
Mipasabot si Terte sa pagahimuong validation anha masayran kung duna ba gyuy lapses si Ingking sa iyang pagdumala isip provincial director didto sa BBPO.
Gipahimangnuan usab ni Terte si Evangelista nga mag-amping sa ipagawas nga pamahayag aron walay masakitan o ba kaha lakip na ang tanang miyembro sa PNP.