Patay ang 67 anyos nga inahan human bunal-bunali og binugha sa iyang kaugalingong anak lalaki nga gituuhang nalisoan sa maayong pangisip samtang naangol usab ang igsuong babaye sa dihang buot unta kining muowang apan giapil hinuon og bunal.
Nahitabo kini sa miaging adlaw pasado ala una sa hapon diha sa ilang pinuy-anan sa Libo bukirang barangay, gibana-bana sa kapolisan dul-an sa 20 ka kilometros ang gilay-on gikan sa Poblacion sa lungsod sa Sibonga.
Ang duha ka biktima daling gidala sa Deiparine Medical Clinic apan gibalhin sa Vicente Sotto Memorial Medical Center sa dakbayan sa Sugbu.
Apan dead on arrival (DOA) sa VSMMC ang inahan nga si Felomina Ortiz Bacaling, samtang pabilin pang giatiman sa mga doktor ang laing biktima nga si Genorama Ortiz, 25, samtang ang amahan niining si Dalmacio, 74 nga igo lang nabunalan og kausa sa tuong tiil wala na magpadala sa tambalanan.
Samtang ang gitumbok nga mibunal og binugha giila nga si Mario Ortiz, 28, ulitawo,
Matud pa si Mario katulo na magsulod gawas sa Psychiatric Ward diha sa Vicente Sotto tungod sa deperensya sa panghuna-huna niini apan ning bag-o lang gikatahong gikuha sa ginikanan ug igsuon aron papaulion na sa ilang pinuy-anan sa Libo kay matud pa maayo na ug naulian na ang maayong pangisip niini.
Si PO2 Antonio Sanchez nga nahinabi sa Banat News mitug-an human sa ilang pagpaniudto ang tulo ka biktima nianang pasado ala una nipahulay una sa makadiyot diha sa tugkaran sa balay kay pagkataud-taod mamalik na sila sa umahan.
Apan ang suspek gikan sa luyong bahin sa ilang balay kalit lang nitunga ug nagbitbit nag binugha.
Unang gibunal-bunalan ang inahan sa nagkadaiyang parte sa kalawasan lakip na ang ulo.
Ang igsuong babaye sa pagkakita nga nahagba na ang ilang inahan niduol unta aron tabangon ang inahan nga nalup-og na sa yuta apan siya naman hinuon ang gisunod sa paghapak og binugha diha sa iyang lawas hangtud nga natumba sa yuta.
Matud ni PO2 Sanchez ang amahan nga si Dalmacio niduol sa suspek aron komprontasihon apan siya ang gisunod nga gihapsan sa binugha apan maayo nalang kay nakalihay pa gyud ug igo lang naigo ang tuong tiil hinungdan nga nikaratil og dagan ug nangayo’g tabang sa iyang mga silingan.
Human sa hitabo ang suspek nibalik og saka diha sa taas sa ilang balay ug wala na gyud manaog og balik.
Matud pang PO2 Sanchez nga nataud-tauran gyud sila sa pagkombinser sa suspek apan sa kadugayan nagakos ra gayud sa iyang kaubang polis.
Sumala pang Sanchez nga ikaupat nga piniriso si Ortiz sulod sa detention cell apan wala hinuoy mahait nga butang nga iyang magamit sa higayon nga masul-an unya sa iyang pangisip.
Ugmang adlawa matud ni Sanchez nga ilang ipasaka sa piskaliya ang kasong parricide batok sa suspek.