Tulo ka polis CPPO, nag-AWOL

Tulo sa unom ka mga polis ang gidistino sa pangulo sa kapolisan sa Probinsya  sa Admin Holding Center diha sa barangay Campoot lungsod sa Tuburan ang wala gyud manunga.

Tungod niini si Cebu Provincial Police Office (CPPO) Director Sr. Supt. Carmelo Valmoria mibahad nga iyang pasakaan og kasong Absence without official leave (Awol) sugod niadtong Huwebes ang tulo ka personnel  gumikan sa kapakyas pagtunga sa ilang bag-ong assignment diha sa Campoot sugod niadtong Lunes.

Gawas sa kasong Awol mag-atubang usab ang tulo og imbestigasyon diha sa CPPO.

Ang gitahasan nga maoy mangulo sa Admin Holding Center diha sa Campoot nga si Insp. Samuel Vercede ni file og leave human gikatahong nasakit kini apan wala pa masayri kung kanus-a kutob iyang leave.

Hinuon sa unom nga nag-una na unta didto sa maong dapit, duha na maoy mi-report sa Campoot ug giingong magsugod na sila og pananom sa mga utanon ug lagutmon sanglit mao kini ang ilang trabaho gawas sa pagbantay sa insurgency problem sa maong lugar.

Matud pang Valmoria nga seryoso siya niining idistino gyud ang mga polis didto sa Campoot nga dunay mga derogatory records.

Nidugang si Valmoria nga nakadawat usab siya og mga derogatory reports ning maong mga polis gikan sa ilang tagsa-tagsa ka hepe ingon man gikan sa mga sibilyan.

Pero matud pang Valmoria nga wala lang marekord ang mga reklamo tungod kay walay nipasaka og kaso ug walay ni-execute og affidavit batok sa mga badlungong mga polis.

Hinungdan nga gidistino nalang ni Valmoria didto sa nahisgutang lugar aron kapahimuslan pa ang ilang kahago sa pagpananom ug makatampo pa gyud sa kinaiyahan.

Gihagit ni Valmoria kadtong dili gusto magpa-assign sa Campoot nga mo-file nalang og Complete Disability Discharge tungod kay permanente na gyud silang madistino didto sa maong dapit.

Nipasabot si Valmoria nga walay angayan nga kabalak-an ang mga polis nga madistino didto sa Campoot kay iyang padad-an og pagkaon.