2 ka hepe sa polis nag-atubang kaso

Duha ka hepe sa kapolisan sa probinsya  nag-atubang  og imbestigasyon sa managlahing buhatan sa Cebu Provincial Police Office (CPPO), usa kanila ang girelibohan.

Kini maoy gipahibalo sa pangulo sa kapolisan sa probinsya Sr. Supt. Carmelo Valmoria atol sa press conference kagahapon.

Si Sr. Insp. Antonio Christian Garcia,  hepe sa Dalaguete Police Station  girilebohan niadtong Septiyembre 28, sa milabay’ng buwan ug gidestino sa Provincial Security Group (PSG).

Dunay report nga si Garcia misuway og babag sa mga sakop sa Provincial Intelligence Branch (PIB) nga milusad og operasyon diha sa lungsod sa Dalaguete batok sa mga masiao coordinators sa miaging semana.

Gikatahong si Garcia mihangyo nga dili lang panakpon ang mga masiao coordinators sa maong lungsod ug miingon nga  mahimo ra kining sabot-sabotan tali sa mga operatiba sa PIB.

Nunot niini wala makauyon ang mga sakop sa PIB sa gihimo ni Garcia hinungdan nga ilang gihimoan og report ug giduso ngadto kang Valmoria.

Gawas niini, matud ni Valmoria nga nakadawat siya’g derogatory report batok kang Garcia apan dili pa niya ikabutyag sa mga sakop sa media samtang iya pang gipa-imbestigar diha sa PIB.

Samtang si SPO3 Mansueto Vicente Lopez maoy kasamtangan officer in charge karon sa Dalaguete nga gihulip ni Valmoria ngadto kang Garcia.

Ang lungsod sa Dalaguete maoy ika-14 ka police station sa tibuok probinsya sa Sugbu nga ang gadumala nagranggo og SPO3 ug SPO4.

Apan mipasabot si Valmoria nga iya nang gi-process ngadto sa higher headquarters niining 14 ka OIC nga kinahanglan ilisdan na gyud og usa ka opisyal apan matud niya nga ipadangat pa nila sa National Police Commission alang sa approval niini.

Samtang sa laing bahin, pabilin hinuong Officer in Charge (OIC) si SPO3 Basiliso Balicoco diha sa Pinamungahan Police station bisan pa man kun nag-atubang siya og imbestigasyon diha sa Provincial Investigation and Detective Management Branch (PIDMB) nga gipangulohan ni Supt. Teofilo Seclot.

Kini nunot sa pagpagawas ni Balicoco sa usa ka piniriso nga walay order gikan sa korte nga nadasmagan hinuon og multicab.