Miapil na si Konsehal Christopher Alix pag-awhag sa Integrated Provincial Health Office (IPHO), ug sa ubang hingtungdang ahensya sa gobyerno pagpalawom sa gihimo niining imbestigasyon.
Kini may kalabutan sa gikatahong pagkahilo sa dul-an sa 40 ka mga tinun-an sa San Agustin Elementary School didto sa lungsod sa Madridejos sa isla sa Bantayan niadtong miaging adlaw.
Ang konsehal nga maoy chairman sa committee on health sa City Council nasurpresa sa maong balita ilabina nga gikatahong nagagikan sa usa ka tindahan sa merkado sa Carbon ang gikaon niining ube milk candy.
Nagduhaduha pagtoo ang konsehal nga ang nahisgutang China-made candy mismo maoy nakahilo sa nahisgutang mga bata tungod kay kini maoy unang kaso sa pagkahilo nga iyang nahibaw-an dinhi sa Sugbu.
Nakasiguro si Alix nga daghan na ang nakakaon sa maong matang sa candy, kung taod-taod na kining gibaligya sa tinubdan diha sa Carbon, hinungdan nga gikinahanglang palawman ang gihimong imbistigasyon.
Sumala sa konsehal nga posibling wa mamatikdi nga nasagulan og butang o kemikal nga makahilo ang maong candy didto sa tindahan sa lungsod sa Bantayan, o di ba hinoon sa nagpalit niini o sa nag-apod-apod sa candy ngadto sa mga tinun-an.
Gitataw ni Alix nga sayo pa kaayo ang paghatag og konklusyon nga ang ube milk candy maoy nakaingon sa pagkahilo sa ubay-ubay nga mga tinun-an, kung wala pay resulta ang gihimong laboratory test niini.
Apan bisan pa man niini, ang konsehal gusto nga masayod kung asa nga tindahan sa Carbon napalit ang maong imported nga candy aron makapahigayon usab ang siyudad og kaugalingong imbestigasyon.