Balay sa inahan sa polis gisunog

Balay sa inahan sa polis  gisunog niadtong Huwebes sa hapon diha sa Sitio Bugna, barangay Jaclupan, dakbayan sa Talisay.

Si PO1 Esperidion Espina kinsa nadestino  sa Cebu Provincial Police Office (CPPO) mibutyag kagahapon sa buntag sa Banat News nga ang ilang gidudahan nga misunog sa balay sa ilang inahan nga si Efrena mao ang paryente ni Ronald Ocariza nga ilang silingan.

Matud ni Espina nga niadtong buwan sa Enero niining tuiga nasikop niya si Ocariza tungod kay misuway kini og sulod sa balay sa iyang inahan.

Si Ocariza kinsa nagdala og sundang niadtong tungora misuway og lugit sa lock sa pultahan sa balay.

Pagsita ni Espina ni Ocariza midagan kini og nahitabo ang ginukdanay ug pag-abot sa suspetsado sa ilang balay mikuha kini og pugakhang.

Si Ocariza gipasakaan og kasong trespass to dwelling ug illegal possession of firearms diha sa Talisay City Prosecutors  Office sa pamilya nila ni Espina.

Ang nahisgutang balay walay tawo tungod kay ang inahan ni Espina diha una mipuyo sa lain niyang anak sa Camella Homes sa  Lawaan.

Niadtong tuig 2006 ang maong balay gilungkab hinungdan sa pagtipon og puyo ni Efrena ngadto sa iyang anak.

Gibutyag ni Espina nga pag-atubang nila sa kaso sa Municipal Trial Court in Cities sa Talisay nabati sa iyang igsuon nga si Andrew nga mibuhi og mga pulong ang amahan ni Ocariza nga si Sosimo nga nagkanayon “wa na pildi na gyud ta aning kasoha” ug ang suod nga higala sa pamilyang Ocariza nga si Narciso Econa, hepe sa tanod sa Barangay Toong niining dakbayan mibuhi usab og mga pulong nga nagkanayon “sige lang ato na silang tagaan og ultimatum kutob karong Oktubre, maayo nang dunay moligdas aron na sila motagam ug makita ang katag.”

Niadtong Huwebes sa hapon miduaw ang mga igsuon ni Espina ug ang iyang mga pag-umangkon sa balay sa ilang inahan hinungdan nga nadiskobrehan nga nasunog na ang balay.