Giilad ang katabang ug ang 15 anyos nga lalaki nga anak sa usa ka doktor sa Belmont Village sa Pakigne, lungsod sa Minglanilla kinsa unang gialarma nga gikidnap ug gidala ang service Toyota Hi-Ace niining sakyanan.
Si PO3 Alin Garciano nga gikahinabi sa Banat News miila sa gibiktima nga mao si Joshua Salazar nga anak sa magtiayong Julie ug Dr. Serapio Salazar.
Matud pa ni PO3 Garciano nga sayo pa sa hapon sa maong adlaw maoy ilang nadawat ang alarma nga kidnapping nga maoy nakaaghat kanilla sa pagpangayo'g panabang sa ubang kuwerpo sa silingang kalungsoran.
Sa ilang pakisusi, nasayran nga sa sayo pa sa maong adlaw nahidangat sa panimalay ang wala mailhing lalaki nga nagpailang higala sa amahan sa biktima nga giingong gisugo sa pagpakuha sa computer machine kay ipaayo.
Gipangayo pa ang yawe sa Toyota Hi-Ace nilang sakyanan kay maoy ilang kargahan ug ang 15- anyos nga biktima nga anak ni Dr. Salazar gipasakay ug gidala usab sa lalaki.
Dugang pa ni PO3 Garciano nga dihang nahiuli nga sa nagsakay og taxi si Joshua ilang nasuta nga nailad ang biktima ug dili kidnapping sukwahi sa unang gikataho ngadto kanila.
Subay usab kini sa asoy ni Joshua nga nanaog ang lalaki sa sakyanan ug gidiskarga ang computer machine ug gipahuwat sa sulod sa parkingan sa dalan Legaspi.
Matud pa sa biktima nga milungtad og pipila ka oras ang iyang pagpaabot sa maong dapit apan ang lalaki wala na gyod mobalik.