Mokabat sa P600 mil ang danyos sa sunog nga nahitabo sa Wireless, Subangdaku dakbayan sa Mandaue sa milabay'ng gabii.
Ang nasunog mao ang Shooters Arm Manufacturing, Inc. nga gipanag-iya ni Romulo de Leon, samtang ang partially burned mao ang German Asian Trade nga gipanag-iya ni Rainer Fox.
Matud pa ni FO2 Cepriano Codilla Jr. ang imbestigador sa Mandaue City Fire Department nga didto magsugod ang kalayo sa mezanine floor sa Shooters ug gumikan sa daghang bala sa maong dapit nagpakapaka kini atol sa pagresponde sa kabomberohan.
Matud pa ni Sunny Dorona sa SS7 Guard Force nga maoy duty guard nakita niya nga didto nagsugod sa circuit breaker sa annex building sa Shooters ang kalayo apan dili niya kini mapakgang gumikan kay wala siyay yawe sa maong edipisyo.
Gumikan niini nagduda si FO2 Codilla nga usa ka electrical short circuit ang hinungdan sa maong pag-ulbo sa kalayo ug inubanan sa mga stocks nga bala sa maong kompaniya ang nakapadako sa maong kalayo.
Hinuon walay naangol sa maong sunog.
Nadawat sa kabomberohan ang maong sunog mga alas 10:30 sa milabay'ng gabii ug gipaubos kini sa 3rd alarm diin nakontrolar kini sulod sa 15 minutos.
Si SFO1 Roy Garcia nga gihinabi sa Banat News miingon nga lakip sa nasunog sa sulod sa maong pabrika sa armas mao ang mga produkto sa Shooters sama sa shotgun, kalibre 357, 9mm pistol, 45 pistol, caliber 38 revolver, caliber 22 magnum, mga bala ug mga pulbora.
Dugang pa niya nga may mga gigama usab nga mga armas nga wala pa mahuman sa pagtrabaho nga gitagana unta alang sa pag-export ngadto sa gawas sa nasud.