Kinhason pabantayan tungod sa red tide

Gipasidan-an sa gobiyerno ang publiko pagbantay sa mga kinhason sa kadagatan basin makakaon sila’g red tide.

Dinhi sa lalawigan sa Cebu gipabantayan pag-ayo sa BFAR ang mga pantalan sa mga lungsod sa Daan Bantayan, San Remegio, Tabuelan ug  Tuburan kay basin anha idunggo sa mga mapahimuslanong mga negosyante ang ilang kargamentong kinhason nga gikan sa mga kadagatan sa Leyte ug uban pang lugar nga gihugpaan sa red tide.

Si Lou Arciaga, tigpamaba sa Bureau of Fisheries and Aquatic Resources (BFAR-7) sa samang higayon mimando usab sa tanang mga mayor ug kapitan sa barangay sa tibuok rehiyon pagbantay sa ilang mga pantalan batok sa mga kargamentong kinhason gikan sa mga lugar nga gihugpaan sa red tide.

Matud pa ni Arciaga nga ang red tide anaa na sa kadagatan sa Leyte nga sikbit ug duol ra kaayo sa kadagatan sa Candijay Bohol.

Busa gikinahanglang alisto ang tanang mga opisyal sa lokal nga kagamhanan aron pag-report gilayon ngadto sa buhatan sa BFAR kun may timailhang may red tide nga madiskobrehan sa ilang tagsatagsa ka lugar.

Ang red tide sa sayo pa mihugpa sa kadagatan sa Samar, Zamboanga, Mindoro ug karon anaa na sa Leyte.

Hinuon gibutyag ni Arciaga nga kun ang red tide dili lang masuyop sa mga kinhason dili kini maghatag og peligro sa kinabuhi sa tawo.

Apan kun anaa na kini sa kinhason unya makaon sa tawo ang maong kinhason sigurado gyud nga mahilo sa red tide ang makakaon sa maong kinhason.

Kasagaran sa mga kargamento nga idunggo sa mga pantalang gagmay ikarga kinig pumpboat unya ibiyahe na usab paingon sa kamerkadohan sa dakbayan sa Sugbu.

Ang kinhason  nga tahong maoy kasagarang ibiyahe sa mga negosyante nganhi sa Sugbu, busa gipasidan-an pag-ayo ni Arciaga ang tanang mga opisyal nga hingtungdan sa pagbantay pag-ayo niini aron kalikayan ang peligro.