Usa ka babaye nga nakigpuyo og lalaki gidunggab sa nangabubho nga kanhi uyab nga tomboy sa miaging gabii sa Socorro Village, Pagsabungan, Mandaue.
Ang biktima mao si Ruthy Agosto, 28, ug ang suspetsado nga nagdunggab mao si Kristina Espinosa, 32 nga nagpuyo sa maong dapit.
Si SPO1 Edgar Pasaylo nga gikahinabi sa Banat News miingon nga nakig-inom ang biktima sa suspetsado ug hangtod nga nahitabo ang panaglalis.
Dugang pa niya nga ang suspetsado kinsa wala na makaagwanta sa kasuko kalit lang mihansak sa tuong kilid ug ilok sa biktima.
Nagtuo si SPO1 Pasaylo nga ang pangabubho sa suspetsado ngadto sa biktima maoy nag-unang motibo sa maong pagpanunggab.
Matud pa niya ang suspetsado nadakpan ug gibalhog sa bilanggoan ug ang biktima nga gidala sa Mandaue City Hospital gibalhin sa Vicente Sotto Memorial Medical Center.