Gihulagway karon sa Cebu City United Vendors Association (CCUVA) nga mga “lost vendor” ang mga naninda daplin sa kadalanan sa dakbayan nga migamit og kariton.
Kini tungod kay matud sa presidente sa CCUVA nga si Maria Pino-Buanghog, wala nila dawata nga mahisakop sa ilang kapunungan ang nahisgutang mga manindahay.
Giklaro ni Buanghog nga bisan asa lang mopahiluna ang maong mga vendor ug lisod kontrolahon hinungdan nga ila kining gibalibaran nga magpasakop sa CCUVA.
Gitataw hinuon ni Buanghog nga wala usab silay plano paglutos sa nahisgutang mga manindahay tungod kay giingong panginabuhi usab ang pagpaninda sa maong mga tawo.
Naobserbahan sa Banat News nga nagkadaghan karon ang mga vendors sa dakbayan nga nigamit og mga push carts.
Partikular na niini ang mga namaligya og mga prutas sama sa mansanas, lanzones, mangga ug uban pa nga nakahatag na og kahasol sa pedestrians.
Kini tungod kay tuyuon sa nahisgutang mga vendors pagbabag ang ilang mga push cart sa sidewalk ilabi na diha sa dalan Colon ug sa Carbon area.
Gani ang ubang nanglakaw sa sidewalk adto na moagi sa karsada tungod kay nababagan na ang ilang agianan sa mga push cart.
Giangkon ni Buanghog nga kini naghatag og risgo sa mga tawo nga delikadong mabag-iran sa mga sakyanan.
Apan subling gipadayag sa presidente sa CCUVA nga wala silay kontrol sa nahisgutang mga vendors tungod kay kini dili ilang mga sakop.
Subay niini, napanglantawan ni Buanghog nga mosamot pa pagdaghan ang mga push cart sa syudad sa mosunod nga mga adlaw, samtang nagkaduol na ang Pasko.
Kini kung walay himuong lakang ang kagamhanan sa dakbayan ilabina ang Squatters Prevention Encroachment and Elimination Division kon SPEED.