Maguwang gipusil sa iyang manghod gumikan sa kahubog didto sa Zone Sikwa, Barangay Paknaan dakbayan sa Mandaue sa milabay'ng hapon.
Ang biktima mao si Ernesto Horcales, 53, minyo, nagpuyo sa maong dapit, samtang ang gitumbok nga mipusil kaniya mao si Alfonso Horcales, 33 ug silingan ra usab sa biktima.
Base sa imbestigasyon ni SPO1 Roberto Hugo sa kapolisan sa Station 3 nasuta nga misung sa panimalay ni Ernesto si Alfonso nga hubog ug nanghasi.
Sa maong pagpanghasi ni Alfonso gikomprontase kini ni Ernesto apan wala siya makabantay nga nagdala og armas nga mobuto si Alfonso diin maoy gigamit niini sa pagpusil ngadto ni Ernesto.
Si Ernesto nga samaran sa iyang walang paa ug likod sa iyang lawas dali kini nga gidala sa tambalanan sa Mandaue City Hospital ug luwas na kini sa makuyaw'ng kahimtang.
Samtang si Alfonso nga buot moeskapo sa maong krimen nasikop sa kapolisan pinaagi nila ni PO2 Helario Ranario ug kaubanan diin gibalhug sa Lapu-Lapu police detention cell.