Patamnon na og mga utanon ug lagotmon ang mga polis nga badlungon sugod karung adlawn’g Lunes sa ilang bag-ong assignment didto sa bukirang barangay sa Campoot, lungsod sa Tuburan.
Ang Cebu Provincial Police Office (CPPO) nitukod sa gitawag og Admin Holding Center, usa ka extention sa Provincial Security Group (PSG) ug Regional Mobile Group (RMG) detachment didto sa nahisgutang lugar nga gipangulohan ni Insp. Samuel Vercede.
Kasagarang ibutang sa maong unit kadtong mga polis nga “floating status” diha sa CPPO nga mga nagpabadlong sa serbisyo nga bisan og idistino pa sa kalungsoran walay bisan usa nga local executive sa kalungsoran ang magpasapol og dawat kanila kundili mo-request gihapon ang mayor nga ibalik sa provincial headquarters.
Karung Lunes mag-una ang lima ka polis didto sa nahisgutang lugar pangulohan ni Insp. Vercede.
Apan matud pa ni Supt Erson Digal, pangulo sa operation sa CPPO nga gawas sa lima ka polis karung Lunes duna pay mas daghang polis ang idistino sa Campoot.
“Wa ko ka kuan pila na sila kabuok, basta daghan to sila ibutang didto as per instruction by our Provincial Director (PD) nga they will issue order asingning them to barangay Campoot mokuan og detachment kanang mga floating boundary adtu didto and then akong gipangutana si PD unsay trabahuon nila didto, ah niingon man nga mangtanom lang usa sila didto,” sumala pa ni Digal.
Hinuon giklaro ni Digal kadtong mga polis nga nag-atubang og imbestigasyon ba kaha kaso ilabi na niadtong napulo ka mga polis gikan sa Cebu City Police Office (CCPO) ipangdistino lang sa pinakaduol nga police station sa lungsod aron dali rang ipatawag sa higayon kung may court hearing.
Si Insp. Vercede, bayente singko na ka tuig sa serbisyo sa PNP ug maoy first commander sa gitukod nga Admin Holding Center sa barangay Campoot.
Nadistino siya sa Samboan Police Station ug Toledo karung katapusan nadistino siya sa PSG sugod niadtong Disyembre sa milabay’ng tuig.
“Bisag asa ok lang! Kay polis manta willing ko maasign anywhere in the Philippines pero wa mi laing trabaho didto tanom-tanom lang ug monitor pod sa mga NPA,” matud pang Insp. Vercede nga nahinabi sa mga tigbalita kagahapon.
Kagahapon ni-request si Vercede og MI6 armalite rifle kutob sa available nga ilang madala karung Lunes didto sa maong lugar.
Nagkanayon si Vercede nga nag-expect na siyang daan nga dunay gubat, sa dihang gipangutana siya sa mga sakop sa media nganong ingon niana ang iyang gihuna-huna, apan matud niya nga usa ka ambush area ug critical area ang maong lugar.
Apan matud pang Digal si Vercede maoy magmonitor sa iyang mga sakop sa higayon nga dunay dili motungha nga polis sa Campoot kinahanglan pahibaw-on sila dayon aron ilang paylan og Absent without official leave (Awol).
Gihulagway ni Digal ang maong dapit nga labihang layoa hinungdan nga walay signal sa cellphone apan ila kining paangayan og radyo aron makahatag gyud og impormasyon si Vercede kanila.