Dul-an sa P.5 milyon nasakiyo
Nahitabo ang pagpanglungkab niadtong Miyerkules sa hapon pasado ala una diha sa Zone 949 barangay Dumlog sa maong siyudad.
Ang gilungkab nga panimalay gipanag-iya sa biktimang si Jinky Danao, 37, minyo.
Nakuhang mga butang sa wala mailhing kawatan ang nagkalain-laing klase sa mga alahas nga mokabat sa kantidad nga P300 mil, usa ka Nokia 3310 nagkantidad og P4 mil ug P3 mil US dolyares nga mokabat sa P135,000 ug ang tanan mokabat sa P439,000.
Base sa imbestigasyon sa theft and robbery section sa Talisay Police Station niadtong tungora ang biktima wala diha sa iyang balay kay nagkuha sa iyang anak sa eskuylahan.
Ang wala mailhing kawatan didto miagi sa bintana sa kusina ug gitangtang ang birha dayon ang blade sa jealousy dayon diretso'g sulod sa kuwarto.
Namatikdan nalang sa biktima nga nahanaw na ang nahisgutang mga butang sa iyang paghiuli sa ilang panimalay.
Ang kapolisan karun sa siyudad sa Talisay nagpadayon sa ilang imbestigasyon aron mailhan ang responsabli niini.
- Latest
- Trending
