Artista naaksidente patay

Namatay ang usa ka artista sa lokal nga telebisyon dinhi sa dakbayan sa Sugbu ug naangol usab ang iyang asawa kinsa iyang angkas human ang ilang gisakyang motorsiklo aksidenteng nabanggaan sa six-wheeler truck nga kargahanan og semento diha sa Cebu South Reclamation Road habig sa  Carmen junction siyudad sa Talisay niadtong Miyerkules sa kaadlawon.

Ang namatay giilang si Renato Enriquez, 45, minyo kinsa niadtong tungora nagmaneho sa Yamaha nga motorsiklo nga nagtangag sa plakang GI-7213 ug naangol ang iyang asawa nga si Genesa Enriquez, hingkod, pulos residente sa barangay Candulawan sa maong siyudad.

Samtang ang gikabangga sa mga biktima mao ang Mitsubishi Fuzo nagtangag sa plaka nga GTR-794 nga gimaneho ni Joy Amoroto, 28, minyo, residente sa GPM Midnorth, Carreta, Reclamation Area dakbayan sa Sugbu.

Si Enriquez usa sa mga cast sa CCTN Channel 47 sa teleserye nga giluohan og “Gugmang dakog Mata” nga sinuwat ni Marcos Navarro Sacol.

Ang Banat News nisuway unta sa pagkontak sa cellphone ni Sacol atol sa pagsuwat ning balita aron makuhaan og reaksiyon apan pakyas tungod kay dili makontak ang cell phone niini.

Usa sa kauban ni Enriquez sa CCTN ang mibutyag nga ang role sa biktima sa maong teleserye usa ka script boy ug supporting cast samtang siya usab ang tigpadala og mga komediya niini.

Base sa taho nga si Enriquez nakainom gikan  sa Barangay Poblacion nga nagmaneho sa iyang motorsiklo apan ang hepe sa traffic division sa kapolisan sa siyudad SPO1 Joseph Glen Burlas nagkanayon sa pakighinabi niini sa Banat News nga mopahigayon sila og follow-up nga imbestigasyon sa maong insidente pagkompirma sa maong taho.

Si Burlas mibutyag nga si Enriquez nauban sa pagkadagit sa iyang motorsiklo ug maayong pagkapusa sa ulo niini samtang ang iyang asawa nalagpot ug nakaangkon usab kini og mga bali sa bukog ug mga bun-og sa lawas.

Sa imbestigasyon sa traffic division sa Talisay nasayran nga paingon sa barangay Tabunok ang mga biktima apan sa ilang pag-abot sa nahitaboan sa may junction box ilang gikabagat si Amoroto paingon sa habagatang bahin  nga labihang kusoga nga nagpadagan sa iyang sakyanan hinungdan nga naigo ang mga biktima.

Matud pang PO1 Erwin Denila sa traffic division nga nahinabi sa Banat News si Genesa maayong pagkalagpot sa sementadong karsada ug nakaangkon kini mga samad, bun-og ug bali sa kalawasan.

Gumikan sa kakusog sa impak ug sa kakusog sa pagpadagan ni Amoroto sa sakyanan si Renato nalabay sa layo hinungdan sa iyang hinanaling kamatayon niini.

Ang duha ka biktima daling gipanghatud sa Talisay District Hospital apan si Renato nakabsan nang daan paghidangat sa tambalanan samtang si Genesa daling gibalhin sa Vicente Sotto Memorial Medical Center alang sa dugang pag-atiman sa mga doktor gumikan sa iyang nahiaguman.

Matud pang PO1 Denila ila nang giandam ang tukmang kaso ni Amoroto sanglit kasamtangan karun gitanggong sulod sa detention cell sa ilang buhatan.