Radaza gusto gyung ipapriso

Determinado ang magpapatigayon nga si Efrain Pelaez Jr., nga ipapriso si Lapu-Lapu City Mayor Arturo Radaza  tungod usab sa iyang nakuhang suporta gikan sa mga magpapatigayon dili lang sa isla sa Mactan kun dili sa Sugbu.

Kagahapong adlawa, ubay-ubay nga mga negosyante ang nipirma og manifesto nga nagsuporta sa krusada ni Pelaez.

Kasagaran niini mga sakop sa Cebu Business Club nga gipanguluhan sa ilang presidente nga si Dondie Joseph.

Gawas niini nakakuha usab og suporta si Pelaez sa iyang kawsa sa Dilaab Foundation nga nakigbatok usab sa pangurakot.

Sila nagkasabot nga i-pressure ang Ombudsman Visayas aron makapagawas na og desisyon sa mga kaso nga giatubang ni Radaza.

Nasayran nga si Radaza nag-atubang og ubay-ubay nga mga kaso sa anti-graft office sulod sa pipila ka tuig niining pagpangatungdanan.

Apan sumala pa ni Pelaez nga usa ka kaso lang ang ilang gikinahanglan nga magkonbikto sa mayor aron kini mabilanggo.

Gawas sa giingong pagpamalit og overpriced nga mga computer, tuyo usab ni Pelaez ug kaubanan nga madesisyunan na ang labing dako nga kaso nga giatubang ni Radaza nga mao ang plunder case may kalabutan sa giingong anomalosong pagpamalit ug mga lamppost nga giinstalar diha sa siyudad sa Lapu-Lapu atol sa ASEAN summit.

Sa pikas bahin niingon si Pelaez nga ila na usab nga isang-at karong adlawa ang mosyon sa Ombudsman alang sa pagsuspenso kang Radaza.

Kini samtang gipahigayon pa ang imbestigasyon sa anti-graft office labot sa ilang gisang-at nga reklamo labot sa pagpamalit sa maong dakbayan og mga computer.

Dugang niini, nagplano usab si Pelaez ug ka-ubanan nga ipa-recall si Radaza ingon man ang pagpasiugda og people power kung gikinahanglan.