Ang Commission on Elections kon Comelec sa siyudad sa Sugbu padayong miawhag sa mga gun owners sa dakbayan nga mo-apply og exemption alang sa gun ban nga hugot nga ipatuman sugod karong Sabado Septiyembre 29.
Matud ni city election officer Attorney Marchel Sarno nga ang mga nanag-iya og armas mangayo lang og porma sa ilang rehiyunal nga buhatan ug mahimo kini na ang mopadala niini ngadto sa Comelec’s Committee on Gun Ban didto sa kauluhan.
Ang Comelec mipagawas na og resolusyon nga magsuperbisar ug mag-regulate sa pagdala og armas, ingon man sa paggamit ug pag-transport niini aron pagsiguro sa hapsay ug malinawon nga Barangay ug SK elections karong Oktubre 29.
Gilatid sa maong resolusyon ang armas nga naglakip sa air guns, side arms, long firearms, hand grenade, ug ubang delikado nga mga explosives, gawas lang sa mga pyrotechnics nga gisugdan na pagpamaligya nunot usab sa nagsingabot nga Pasko.
Gitataw ni Sarno nga ang election gun ban unya pa motapos sa Nobiyembre 13, ug sa maong mga panahon, gidid-an ang si bisan kinsa nga magdala og armas nga mapakyas pagkuha ug exemption sa Comelec.
Sa pikas bahin, giawhag usab sa election officer ang mga nagplano pagpapili sa umaabot nga Barangay ug SK elections nga mas maayong idungan na lang pagduso sa ilang tagsa-tagsa ka Certificate of Candidacy kon COC ang resulta sa drug test.
Ang tanang mga kandidato gikinahanglang mopaubos og drug test sa mga accredited ug authorized drug testing center sa Department of Health kon DOH, sigun sa nalatid sa Comelec resolution number 8302.
Sumala pa ni Sarno nga ang drug testing certificates sa tanang magpapili sa umaabot nga eleksyon karong Oktubre 29, kinahanglang isumitir sa buhatan sa mga election officer hangtud sa Oktubre 28.
Ang mga election officer maoy mopreparar sa lista sa mga kandidato nga napakyas o nakasubmitir sa ilang drug testing certificate sa gitakdang petsa, ug kini usab ang moduso niini ngadto sa law department sa ilang ulohang buhatan.