Subling nisiaw og balik ang mga illegal nga pagpanagat sa kadagatan sa lungsod sa Daanbantayan nga padayun karung gi-problema sa mga opisyal sa maong lungsod.
Mao kini gitug-an ni Daanbantayan vice mayor Maria Luisa Loot dihang nahinabi sa mga tigbalita.
Gibutyag ni Loot nga pagkakarun nawad-an na sila og kadasig nga manakop niining maong mga responsabli sa mga illegal fishing gumikan sa kadaghan sa mga tawo nga ilang nadakpan ang makagawas lang usab dayun human ipangbasura sa piskaliya ang mga kasong ilang gipasaka.
Gikonpirmar ni Loot nga pagkakarun nisi-aw og balik ang mga illegal fishing sa kadagatan sa barangay Malapascua ug Maya apan molihuk lang ang mga ilegal nga panagatan sa higayun nga modagku ang bawod.
Gi-angkon ni Loot nga maglisud ang ilang mga sakop sa bantay Dagat pagpahigayun og mga pagpatrolya sa kadagatan kun modaku ang bawod gumikan kay dili makasugakod ang mga pumpboat.
Gihagit hinuon ni Loot ang hepe sa Visayan Sea Squadron nga si Atty. Antonio Opposa nga tinuoron ang gipasalig niini nga motabang kanilang mga lokal nga opisyal sa kampanya batuk sa illegal fishing.
Apil sa iyang giawhag ang mga opisyal sa kabarangayan ilabina sa barangay Malapascua og Maya nga manginlabot sa kampanya pagsumpo sa nisiaw og balik nga illegal nga pagpanagat sa ilang lungsod.