Tulo ka VCS cops ibutang sa SSG

Gimando ni Sr. Supt. Patrocinio Comendador nga ibutang sa Service Security Group ang tulo ka mga polis nga gipasanginlang nangilkil sa usa ka negosyante samtang nagdagan pa ang kaso diha sa Ombudsman for the Visayas.

Si Comendador sa pakighinabi sa Banat News mitug-an nga dili pa makapahamtang ang Cebu City Police Office og silot administratiba ngadto nila ni SPO1 Jaime Otadoy, PO1 Raneil Campangan ug PO2 Rey Albotra.

Matud pang Comendador madoble na unya ang kasong administratibang gisang-at kanila sanglit ang National Bureau of Investigation nga maoy nakasakop kang Otadoy atol sa giingong entrapment operation niadtong Miyerkules mipasaka naman og kasong administratiba batok kanila. Hinuon gipanghimakak kini ni Otadoy.

Sumala pang Comendador ang tulo dili una ibutang sa trabahong naglambigit og operasyon ug hayan adto sila ibutang sa mga trabaho sa opisina aron mamonitor usab ang ilang mga lihok.

Midugang si Comendador nga ang pag-disband niya sa Vice Control Section kini gumikan sa daghan nang mga reklamo ug mga impormasyong iyang nadawat kabahin sa ilang mga iligal nga kalihukan.

Ikaduha usab mao nga ang function sa VCS gihimo naman karon sa Criminal Investigation and Intelligence Branch.