Badlungong polis giabog ni Mike

Giabog na ni Cebu City Vice Mayor Mike Rama ang mga badlungong opisyal ingon man mga sakop sa Cebu City Police Office (CCPO) nga mobiya nalang sa ilang pag-alagad dinhi sa dakbayan.

Ang panawagan ni Rama subay usab kini sa iyang hugot nga suporta sa baruganan  ni Cebu City Mayor Tomas Osmeña kinsa gustong mataktak ug mabilanggo si SPO1 Jaime Otadoy sakop sa Vice Control Section kinsa nadakpan sa usa ka entrapment sa National Bureau of Investigation (NBI-7) diha sulod sa CCPO nga nangilkil sa ilang dinakpan.

Ang bise mayor miingon mas makaayo unta nga kadtong mga opisyal sa kapulisan dinhi sa dakbayan ingon man mga sakop niini nga nalambigit sa samang binuhatan ni SPO1 Otadoy boluntaryo nalang untang mobiya.

Gipasabot niini nga dili nalang unta paabuton pa sa maong mga opisyal  nga sila maoy mosunod ni SPO1 Otadoy hinungdan nga aron usab malimpiyo ang CCPO boluntaryo nalang kini ug moluwat sa ilang katungdanan o kaha mobalhin ngadto sa laing lugar.

Ang bise mayor kinsa mao say tsirman sa Police Coordinating and Advisory Council sa konseho sa dakbayan nipadayag gyud sa iyang kasagmuyo bisan paman sa ilang mga maayong tambag ug mga seminars ngadto sa kapulisan.

Hinuon iyang giklaro nga bisan paman niini nga gusto silang matangtang ug mabilanggo,  si SPO1 Otadoy gikinahanglan usab nga hatagan kini og due procces of law aron makatubag sa iyang kasaypanan.