Giinsister ni Cebu City South District Congressman Antonio Cuenco nga i-apil sa pagpasaka og kaso ang kanhi hepe sa nabungkag na nga Vice Control Section sa Cebu City Police Office nga si Inspector Wilbert Parilla.
Kini may kalabutan sa giingong pagpangilkil sa mga sakop sa Vice Control Section nga miresulta sa entrapment operation sulod mismo sa buhatan sa nahisgutang police unit human nireklamo ang ilang gidakop ngadto sa National Bureau of Investigation kon NBI-7.
Ang biktima nga si Reuel Lerio gikataho nga gidakop sa mga sakop sa Vice Squad tungod sa giingong pagpayuhot niini og ginadiling drugas apan sumala ni Lerio nga siya gipangayoan og 1.2 milyones ka pesos bugti sa iyang kagawasan.
Nasayran nga sila lang si SPO1 Jaime Otadoy, PO3 Rey Albotra ug PO1 Raniel Capampangan maoy gipasakaan sa NBI-7 og kasong Robbery with Threats and Intimidation ngadto sa piskaliya.
Apan matud ni Cuenco nga trabaho na sa piskaliya ang pagdeterminar kung duna bay kalambigitan si Parilla sa maong kahiwian ilabina nga nalakip ang pangalan niini sa affidavit sa biktima nga si Reuel Lerio.
“Kinahanglan gyod nga i-apil si Parilla anang kaso nga gipasaka sa NBI kay gilambigit man kaha usab siya sa biktima. Anaa na kana kang Parilla kung unsaon pagpanalipod ang iyang kaugalingon,” sumala ni Cuenco.
Nidugang ang kongresista nga kinahanglang tinud-on sa NBI ang gipahigayon niining imbestigasyon ug pagpasaka og tukmang kaso batok sa mga nalambigit sa maong kahiwian aron magpanuko na ang ubang mga polis pagbuhat sa ingon.
Matud ni Cuenco nga usa sa mga hinungdan nganong lisod sumpo-on ang problema sa ginadiling drugas tungod kay dunay badlungong mga polis nga mangilkil na hinuon sa ilang mga dinakpan nga drug pusher.
Taliwa niini, mapasalamaton gihapon ang kongresista ngadto sa NBI-7 tungod sa malampuson nilang pagpahigayon og entrapment operations nga niresulta sa pagkasikop sa nahisgutang mga sakop sa Vice Control Section.