Nagsagol ang gibati ni Supt. Pablo Labra, ang deputy director for administration sa Cebu City Police Office human sa entrapment operation sa mga sakop sa National Bureau of Investigation diha sa Vice Control Section.
Miangkon si Labra sa mga tigbalita nga dismayado siya, naguol ug nasagmuyo sa hitabo sanglit diha mismo sa ilang tugkaran nahitabo ang entrapment operation batok sa iyang kaubanan.
Apan si Labra nagkanayon nga bisan paman niini angayang dawaton nga positibong kalamboan ang nahitabo tungod kay nakuhaan ang mga badlungon diha sa ilang buhatan.
“Sa akong bahin, I want to take it positively because ang maong insidente should serve a lesson to the policemen nga nagbuhat og mga dautan, dili ikalimod nga we felt and actually I still do to feel sad about it because despite the effort nga atong gibuhat sa pagsulti sa atong mga kauban sa pagtinarong sa serbisyo wala gyud sila mosunod nato. So ila na ni karong tulubagon ilaha na nang problem basta kami sa CCPO wala mi magkulang. Nasubo that this things happen nga nakadaot sa whole organization, the CCPO ilabi na ang atong city director does not condone this kind of attitude, and this should serve as a lesson,” asoy pang Labra.
Matud pang Labra nga bisan paman sa ilang paninguhang mabantayan ug mabadlong ang mga polis nga nalambigit sa iligalidad padayon gihapon sila niini pinaagi sa tinago-tago nga paagi.
Samtang ang hepe sa gibungkag na nga Vice Control Section nga si Insp. Wilbert Parilla gibutang na sa ilawom sa buhatan ni Sr.Supt. Patrocinio Comendador.
Matud pang Labra nga dunay himuong imbestigasyon batok kang Parilla nunot sa migawas nga pamahayag sa negosyanteng gidakop sa mga polis nga si Ruel Lerio.
Si Lerio mipasangil nga gidakop siya sa tulo ka mga polis nga sila si SPO1 Jaime Otadoy, PO2 Raneil Capampangan ug PO3 Rey Albotra nga ilang gihulgang kasuhan og paglapas sa RA9165 kun dili kini mohatag og P1.2 milyon.
Apan ang maong pag-aresto wala mapatik sa blotter sa maong unit hinungdan nga mas nakapasamot pa kini sa pagduda.
Si Labra nagkanayon nga manubag si Parilla isip hepe sa VCS kun nganong wala kini makamatikod ug makabadlong sa mga kahiwian sa iyang mga sakop ug sa ilang mga iligal nga mga gipangbuhat.
Ang laing duha ka mga polis nga sila si Albotra ug Capampangan gimandoan nga magpundo diha sa CCPO samtang gipaabot pa ang kasong ipasaka sa NBI-7 batok kanila ug aron usab sila madali og patawag.
Samtang ang kinse ka mga sakop sa VCS ipamalhin sa nagkadaiyang police stations ug special units sa CCPO ilabi na sa mga imbestigador gawas sa mga operatiba.
Samtang gihangop ni Cebu City Councilor Augustus Pe, Jr., ang hingpit nang pagbungkag sa Vice Control Section sa Cebu City Police Office kon CCPO.
Ang konsehal nga maoy chairman sa Committee on Public Order and Safety sa City Council niingon nga tukma lang ang maong lakang.
Nabalaka si Pe nga pahimuslan lang unya ang Vice Control Section sa mga sakop niini kung magpabilin ang maong police unit.
Kini human usab malambigit ang mga sakop sa Vice Control Section sa pagpangilkil ngadto sa ilang gidakop nga si Ruel Lerio.
Partikular na niini si SPO1 Jaime Otadoy ug kaubanan nga gi-entrap sa National Bureau of Investigation kon NBI-7 sud mismo sa buhatan sa VCS.
Wala na hinuon masurpresa niini si konsehal Pe tungod kay siya giingong makadaghan na makadungog og entrapment operation nga naglambigit og polis.
“That was not the first time nga dunay pulis nga gi-entrap sa NBI-7, maayo na, magpasalamat ta sa NBI ana,” sumala pa sa konsehal.
Subay niini gipadayag ni Pe nga automatic usab nga matangtang ang usa ka libo ka pesos nga monthly allowance sa maong mga polis nga gikan sa city government.