Atty. Tolentino nalipay sa pagkasikop sa sakop sa VCS

Gipasalamatan ni kanhi Integrated Bar of the Philippines (IBP) Cebu City Chapter President Atty. Alex Tolentino sila si Police Regional Office director Silverio Alarcio, Jr. ingon man ni Cebu City Police Office Chief Sr. Supt.  Patrocinio Comendador human sa malampusong pagkasikop ni SPO1 Jaime Otadoy sa usa ka entrapment niadtong milabay'ng adlaw diha sa CCPO.

Sumala pa ni Tolentino nga dako kaayo ang iyang pasidungog ngadto kang Alarcio ug Comendador kini human usab nisugot nga ipahigayon gyud sulod sa CCPO sa National Bureau of Investigation-7 ang entrapment batok sa ilang mga sakop  kinsa nidemanda og usa ka milyon ngadto sa ilang dinakpan   nga si Ruel Lerio.

Matud pa niini nga kun wala pa musugot ang duha ka mga dagkong haligi sa kapulisan dinhi sa Sugbu hayan ang maong kalihukan sa mga badlungong polis magpadayon kini sa ilang naandang binuhatan nga mo-planted ug mangilkil sa ilang dinakpan.

Gani iyang giawhag ug gipanghinaot nga sila si Alarcio ug Comendador nga lantawon usab niini ang ubang mga police units dinhi sa dakbayan gumikan kay siya nagtuo nga aduna pay uban niining nalambigit sa pagpangilkil ngadto sa mga dinakpan sa drugas.

Nagtuo usab siya nga aduna pay mga tag-as nga opisyal diha sa CCPO gawas kang  Insp. Wilbert Parilla sa Vice Squad Section ang nalambigit sa mga pagpangilkil kini tungod kay nitakod-takod na kining maong problema sa kapulisan ug dili lang gamay ang naapektuhan niini.

Hinuon aduna pa siyay pagsalig sa ubang mga polis nga nagtinarong usab sa ilang katungdanan, gani human sa maong hitabo nakabatyag siya nga na vindicated siya sa iyang pagduda niadtong mga aduna gyoy mga polis nga mo-planted og ebidensya sa mga gipasanginlan sa ilegal nga drogas..

Subay niini iyang gipadayag nga tukma lang nga giwagtang sa CCPO ang Vice Control Section sa ingon mataral usab kadtong mga nalambigit nga mga sakop niini. – Guam P. Logroño