Komentarista gipasaylo ni Cheryl Ouano apan padayon ang kaso

Gipasaylo na ni Cheryl Ouano ang kanhi komentarista sa usa sa mga estasyonan sa radyo dinhi sa Sugbu  kinsa nipakauwaw kaniya sa milabay'ng tuig pinaagi sa pagpadayag sa mga programa niini sa radyo nga siya ug si kanhi Mayor Thadeo Ouano sa dakbayan sa Mandaue adunay relasyon.

Gipadayag ni Cheryl human usab si Joash Dignos nalutsan og warrant of arrest sa korte apan nakapiyansa kini og P70 mil sa milabay'ng adlaw sa pito ka count nga libel.

Si Dignos gisikop sa mga polis didto sa Malaybalay Bukidnon.

Si Cheryl nagkanayon nga isip usa ka Kristiyano iyang gipasaylo si Dignos.

Apan giklaro ni Cheryl nga ang pito ka mga libel case nga ilang gipasaka batok kang Dignos diha sa korte sa Mandaue magpadayon kini ug gikinahanglan nga mahatagan sila og hustisya sa pagyaga-yaga ug pagpakauwaw ni Dignos ngadto sa ilang pamilya ug bisan pa kun nalutsan og warrant si Dignos ug nakapiyansa sa maong kaso nagpabilin gihapon ang danyos nga nahimo niini sa ilang pamilya.

Samtang si kanhi Mayor Thadeo Ouano nga nahinabi sa Banat News nagpasalamat nga nahatagan na og hustisya ang iyang pamilya sa pagpakauwaw ni Dignos.

Si kanhi Mayor Ouano subling nihimakak sa maong pasangil ni Dignos ngadto kaniya.

Buot usab sa kanhi mayor nga masuta kung kinsa ang utok sa  maong pasangil nga gipasibaw sa komentaristang taga Mindanao.