Gumikan sa kabalaka nga posibleng duna pay laing mahitabo nga pagpanulis dinhi sa siyudad ug probinsya sa Sugbu giumol og balik sa kapolisan sa probinsya ang usa ka task group.
Si CPPO director Sr. Supt. Carmelo Valmoria, mi-activate og balik sa Anti Bank Robbery task group ug gitahasan si CPPO director for Operation Supt. Erson Digal nga maoy mangulo niini.
Sa press conference kagahapon sa Provincial Headquarters gibutyag ni Valmoria nga iyang gimanduan ang tanang hepe sa polis sa kalungsoran nga makig-alayon sa mga kadagkuan sa bangko ug establisamento nga anaa sa ilang lugar nga palapdan ug pahugtan ang security measures.
Nipasabot si Valmoria nga kining pagsumpo sa tulis dili lang kay trabaho sa polis tungod kay duna usab dakong papel ang mga kadagkuan sa bangko ug ang establisamento nga mohimo’g kaugalingon nga pagpahugot sa ilang seguridad ug pakig-abag sa PNP.
Gimando usab ni Valmoria ang pagpahigayon og checkpoints kada adlaw ug mahimong anha ipahigayon duol sa bangko ug establisamento ug kadtong mga lugar nga posibleng agianan sa mga tulisan.
Wala usab gisalikway ni Valmoria nga posibling duna pay laing tulis nga mahitabo ug gani iyang giawhag ang kumunidad nga motabang kanila ilabi na kung dunay makit-an nga kadudahan ang linihokan sa pag-report gilayon sa kapolisan aron mapakgang kung duna may grupo nga nagplanong manulis.