Gitakdang mopalabang og resolusyon ang kahugpungan sa mga Muslim dinhi sa Sugbu nga mag-awhag kang Presidente Gloria Arroyo sa pagpahunong na sa nagpadayon gubat sa militar batok sa bandidong pundok sa Abu Sayaff ug Moro Islamic Liberation Front (MILF)sa Basilan.
Gipadayag sa labaw sa Voice of Islam dinhi sa Sugbu Ustadz Najib Razul dihang nahinabi sa usa ka estasyonan sa radyo nga angay hunongon na ang maong gubat ug ipadayun ang subsob nga imbestigasyun batok sa pipila ka sakop sa MILF nga maoy responsable sa pagpatay ug pagpunggot sa ulo sa 10 sa 14 ka sakop sa Marines.
Gipasabot ni Razul nga naangin ang mokapin 3 mil ka mga molupyo nga sibilyan sa Basilan sa nagpadayong gubat sa maong lugar.
Gani subay sa report nga nadawat ni Razul duna nay 8 mil ka mga pamilya ang nanglayas sa Basilan tungod sa kahadlok nga mapagan sa maong kagubot.
Matud niya angay seryosuhon ug ipunting sa gobyerno ang imbistigasyon pagtumbok sa mga sakop sa bandidong grupo tungod kay mao kadto ang angay manubag sa mga nahimo nilang salaod.
Nabalaka si Razul nga mas modaghan pa ang mga pamilya sa Basilan nga manglayas sa maong dapit paglikay sa maong kagubot.
Hinoon giklaro niya nga pagkakarun wala pa silay report nga nadawat nga duna nay mga kaigsoonan nilang muslim didto sa Basilan ang nibakwit dinhi sa Sugbu.
Gisuportahan ni Msgr. Esteban Binghay ang lakang sa Catholic Bishops Conference of the Philippines nga nag-awhag sa gobiyerno nga hunongon na ang gubat didto sa probinsya sa Basilan.
Si Binghay nipadayag nga bisan paman terorista ang Abu Sayyaf gikinahanglan gihapon ang diyalogo aron mahunong ang duguong hitabo ug ang kaluwasan sa mga sibilyan nga maoy labing naapektuhan sa maong kagubot.
Sumala pa niini ang kusog batok sa kusog dili makasulbad sa problema sanglit ang sinugdanan niini tungod sa kakabus sa mga tawo sa maong lugar.
Hinoon iyang giklaro nga wala kini magpasabot nga ipahunong na ang pagpakiggubat kun dili suwayan lang una og negosasyon aron dili na mograbe ang sitwasyon ug wala nay lain pang sibilyan nga maapektuhan.