TV-Ad sa beer way maayong leksyon sa bata

Gikwestyon ni Cebu City Councilor Arsenio Pacaña ang commercial sa telebisyon sa usa ka brand sa beer nga alanag kaniya dili maayong presentasyon diin gipakita ang pagpulbos sa kontra human niinom sa maong beer.

Ang konsehal moawhag sa Advertising kun AD Board nga mo-review sa presentasyon sa nahisgutang TV commercial tungod kay alang kaniya nagpakita og ngil-ad nga panag-ingnan sa kabataan.

Nidugang si Pacaña nga ang nahisgutang TV commercial naghulagway sa negatibong values sama sa kakuwang og pasensiya, kasilag, ug uban pa.

Nabalaka si Pacaña nga maapektahan sa maong pahinumdum sa telibisyon ang “Filipino values” nga dugay nang gisagop sa panahon.

Labaw nang gikabalak-an sa konsehal nga kini sundugon sa uban ilabina sa mga sakop ug fraternity ug mga gangs nga modugang na hinoon sa nagkataas nga kriminalidad sa siyudad.

Matud sa konsehal nga ang bayolenteng kultura nga gipakita sa maong pahinumdum dili madawat sa katilingban.

Ug ang padayong pagpasalida sa nahisgutang TV commercial makahatag lang og negatibong resulta sa gitinguha sa mga awtoridad nga mao ang pagtanom og kalinaw ug mabugnawong  huna-huna.

Gipadayag ni Pacaña nga way dautan kung ang tuyo sa usa ka TV commercial mao ang pagkuha sa atensiyon sa mga viewers apan gikinahanglang dili kini supak sa maayong gawi ilabi na sa kultura ug tradisyon sa mga Filipino.