Nagpirmahay na sa Memorandum of Agreement (MOA), sila si Rep. Benhur L. Salimbangon ug Dr. Gerardo M. Aquino, chief sa Vicente Sotto Memorial Medical Center (VSMMC), niadtong miaging adlaw, bahin sa Medical Indigent Support Program.
Suma sa gikauyonan sa maong MOA nga unahon gayud pagtagad sa VSMMC kadtong mga pasyente gikan sa 4th Dist. sa lalawigan sa Sugbu nga naghupot og "Benhur Health Card" nga gipang apod-apod sa mga kabus nga lumolupyo sa distrito.
Kun ang pasyente magkinahanglan og major operation adunay P10,000 nga giandam alang kanila ug alang sa mga pasyente nga gamay ra ang himoon nga operasyon tag P3,000 ang gigahin sa programa, ug ang tanang pasyente ubos niining Medical Indigent Support Program, adto ipahimutang sa Charity Ward sa VSMMC.
Ang medical assistance nga libreng ipanghatag sa mga in-patient-indigents, mao ang mga tambal, mga galastohan sa laboratory, ECG ug X-RAY ug uban pang mga bayranan sa laboratory tests, matud sa maong MOA.
Gikasabutan usab nga ang VSMMC hatagan og katungod ni Rep. Salimbangon sa pagpamalit daan sa mga tambal nga kasagaran maoy idapat sa mga pasyente nga masulod sa ospital aron duna dayo'y magamit sa panahon nga adunay masulod nga pasyente ubos sa maong medical assistant program.
Ang salapi nga gamiton unya sa pagpamalit sa mga tambal adto kuhaa sa Medical Assistance Fund ni Rep. Salimbangon. Gani aduna nay gihatag nga usa ka milyon ug tunga (P1,500,000.00) ngadto sa VSMMC isip pasiuna sa diyes milyones (P10,000,000.00) nga igahin alang niining Medical Indigent Support Program. Kining salapi kinabuhi gikan sa Gen. Appropriation Act of 2002 pinaagi sa Development Assistance Fund (PDAF) ni Rep. Salimbangon.
Nipirma usab sa maong kasabutan si Madam Mariquita S. Yeung isip presidente sa MSY Foundation nga maoy moabag niining maong programa alang sa mga kabus sa ika-upat nga distrito sa lalawigan sa Sugbu.