Nangampanyang polis gilabay gawas Borbon

Gibalhin na og laing lungsod ang polis nga nadistino sa Borbon Police Station nga  gireklamong nangampanya atol sa eleksyon niadtong Mayo 14, human gipirmahan sa hepe sa kapolisan sa probinsya ang request to “transfer” ni Borbon Vice Mayor Niel Vergara.

Atol sa press conference giklaro ni Cebu Provincial Police Office (CPPO) Director Sr. Supt. Carmelo Valmoria ang iyang pagsanong sa hangyo nga ipabalhin ang polis wala magpasabot nga sad-an na kini.

Si PO1 Roger Vanguardia gibalhin na didto sa Argao Police Station gikan sa Borbon.

Hinuon nipasabot si Valmoria nga nagkuwang gyud og personnel ang Argao Police Station hinungdan nga didto niya kini ibalhin si PO1 Vanguardia.

“Atong gipa background check palang sa nato si Vanguardia duna tay gitahasan nga sakop sa Intelligence personnel nga mosusi didto maski humana ang eleksyon kuan man gihapon na sa partisanship bitaw?” pulong pa ni Valmoria.

Kahinumduman niadtong milabay’ng  Biyernes si Niel Vergara mianha sa CPPO ug naghatud sa iyang suwat nga naghangyo nga ipabalhin ang maong polis sa laing lugar gani gawas sa rehiyon siyete.

Kini tungod sa kalagot ni Vergara ug sa iyang mayor nga si Butch Sepulveda human sila makahibalo nga   nangampanya si Vanguardia batok  kanila niadtong nagsingabot ang eleksyon.

 Matud ni Valmoria iyang gibalhin og laing lugar si Vanguardia aron dili makontrahan sa namunoan sa maong lungsod ug aron usab dili maguba ang maayong relasyon tali sa kapolisan ug sa lokal nga kagamhanan.

Sa higayon nga mamatud-an si Vanguardia nga tinuod nga nangampanya mag-atubang usab kini og laing kaso.